សហរដ្ឋអាមេរិក បានលើកឡើងថា ខ្លួនមិនគាំទ្រឲ្យអ៊ីស្រាអែលគ្រប់គ្រងតំបន់ហ្កាហ្សា ក្រោយ​ចប់​សង្រ្គាម​ទេ។ សេតវិមាន រក្សាគោលជំហរកាលពីថ្ងៃអង្គារថា ខ្លួនពុំជឿថា កងកម្លាំងអ៊ីស្រាអែល​គួរ​តែ​គ្រប់គ្រង​តំបន់ហ្កាហ្សាទេ ក្រោយការអត្ថាធិប្បាយរបស់លោកនាយករដ្ឋមន្ត្រីបេន ចាមីន​ណេតាន​យ៉ាហ៊ូ (Benjamin Netanyahu) ថា​ប្រទេស​របស់​លោក​នឹង​ទទួល​ខុស​ត្រូវ​ផ្នែក​សន្តិសុខ​ទាំង​ស្រុងក្នុងតំបន់ហ្កាហ្សាសម្រាប់ពេលវេលាមិនកំណត់ ក្រោយចប់សង្គ្រាមនេះ។

អ្នក​នាំពាក្យក្រុមប្រឹក្សាសន្តិសុខជាតិលោក John Kirby បាននិយាយក្នុងកម្មវិធីព័ត៌មាន "CNN This Morning"ថា លោកប្រធានាធិបតីនៅតែជឿថា ការគ្រប់គ្រងតំបន់ហ្កាហ្សាឡើងវិញ ដោយ​កង​កម្លាំង​អ៊ីស្រាអែលគឺមិនល្អទេ។វាមិនល្អសម្រាប់អ៊ីស្រាអែលទេ វាមិនល្អ​សម្រាប់​ប្រជាជន​អ៊ីស្រាអែល​ទេ។  

ការព្រមានចុងក្រោយបំផុតពីសេតវិមានកើតឡើងបន្ទាប់ពីលោក Netanyahu បានប្រាប់​កម្ម​វិធី​ទូរទស្សន៍ ABC News កាលពីថ្ងៃចន្ទថា តំបន់ហ្កាហ្សាគួរតែត្រូវបានគ្រប់គ្រងដោយ អ្នក​ដែល​មិន​ចង់​បន្ត​ផ្លូវរបស់ក្រុមហាម៉ាស មុនពេលបន្ថែមថា លោកគិតថាអ៊ីស្រាអែលនឹង កាន់កាប់​សម្រាប់​រយៈ​ពេលមិនកំណត់ ដោយការទទួលខុសត្រូវផ្នែកសន្តិសុខជារួម ព្រោះយើង​បាន​មើល​ឃើញ​រួច​មកហើយ ថាមានអ្វីកើតឡើងនៅពេលដែលយើងមិនបានធ្វើនោះ។

នេះគឺជា​តម្រុយ​មួយក្នុងចំណោមតម្រុយជាច្រើន ដែលលោកនាយករដ្ឋមន្ត្រី Netanyahu បាន​ផ្តល់​ឲ្យ​អំពីចក្ខុវិស័យរបស់លោកសម្រាប់តំបន់ហ្កាហ្សាក្រោយសង្គ្រាម ហើយបាន​បង្ហាញ​ពី​ទស្សនៈ​ខុស​ពីសហរដ្ឋអាមេរិក រួមទាំងសេចក្តីថ្លែងការណ៍ផ្ទាល់លោករបស់ប្រធានាធិបតី Joe Biden អំពីអ្វីដែលជាអនាគតរបស់តំបន់មួយនេះ។ ក្នុងបទសម្ភាសន៍ជាមួយទូរទស្សន៍ ៦០នាទី “60 Minutes”របស់ទូរទស្សន៍ CBS កាលពីខែមុន លោក Biden បាននិយាយថា វានឹងក្លាយជា កំហុស​ដ៏ធំ សម្រាប់អ៊ីស្រាអែលក្នុងការគ្រប់គ្រងតំបន់ហ្កាហ្សា ។

នៅពេល​នោះ លោកម៉ៃឃើល ហ៊ើហ្សុក( Michael Herzog) ឯកអគ្គរដ្ឋទូតអ៊ីស្រាអែលប្រចាំ សហរដ្ឋ​អាមេរិក បានប្រាប់អ្នកសម្របសម្រួលកម្មវិធីទូរទស្សន៍ CNN លោក Jake Tapper ថា អ៊ីស្រាអែល ពុំមានបំណងគ្រប់គ្រងតំបន់ហ្កាហ្សាទេ បន្ទាប់ពីជម្លោះបានបញ្ចប់៕