ការវាយប្រហារតាមអាកាសដ៏ខ្លាំងក្លាពីអ៊ីស្រាអែលអំឡុងប្រតិបត្តិការលើតំបន់ហ្កាហ្សា បាន​បំផ្លិច​បំផ្លាញ​យ៉ាងធ្ងន់ធ្ងរលើជំរំជនភៀសខ្លួនប៉ាឡេស្ទីន ខណៈមន្ទីរពេទ្យ និងសាលារៀននានា គ្រប់​គ្រង​ដោយអង្គការសហប្រជាជាតិ ក៏ត្រូវ​បាន​ខូចខាត​ដោយ​ការ​ទម្លាក់​គ្រាប់​បែក​យ៉ាង​ខ្លាំង​ផង​ដែរ​។

ក្នុងចំណោមតំបន់ដែលរងផលប៉ះពាល់មានជំរំជនភៀសខ្លួន អាល់ប៊ូរ៉េច(Al Bureij) ដែល​ជា​ជំរំ​តូចមួយក្នុងតំបន់ហ្កាហ្សា ផ្ដល់ជម្រកដល់ជនភៀសខ្លួនជាង ៤៣.០០០ នាក់​លើ​ផ្ទៃ​ដី​ទំហំ​កន្លះ​គីឡូ​ម៉ែត្រ​ក្រឡា។ ដោយមានទីតាំងនៅជិតរបងព្រំដែនភាគខាងកើតជាមួយអ៊ីស្រាអែល វា​បាន​ក្លាយ​ជា​គោលដៅនៃការវាយប្រហាររបស់អ៊ីស្រាអែល។

កាលពីថ្ងៃព្រហស្បតិ៍ យន្តហោះចម្បាំងរបស់អ៊ីស្រាអែល បានបើកការ​វាយ​ប្រហារ​តាម​អាកាស​ជា​ច្រើន​លើក​លើជំរំមួយនេះ ដែលបានបំផ្លិចបំផ្លាញទាំងស្រុង នៃប្លុកលំនៅដ្ឋានទាំងមូលចំនួន៣០ ។ ក្រសួង​សុខាភិបាលប៉ាឡេស្ទីនបានរាយការណ៍ពីចំនួនអ្នកស្លាប់ចំនួន ២២នាក់ ខណៈរាប់​សិប​នាក់​ទៀត​នៅ​បាត់ខ្លួននៅក្រោមគំនរបែកបាក់។  

ទោះបីជាការ​វាយប្រហារបានដាក់គោលដៅលើសាលារៀន ដែលគ្រប់គ្រង​ដោយ​អង្គការ​សហ​ប្រជាជាតិ​អំឡុងប្រតិបត្តិការរបស់អ៊ីស្រាអែលយ៉ាងណាក៏ដោយ ក៏គ្រួសារប៉ាឡេស្ទីន​នៅ​តែបន្ត​ស្វែង​រក​ទីជម្រកនៅក្នុងសាលារៀន ព្រោះគ្មានជម្រើស។

សាលាបឋមសិក្សាអាល់នូសេរ៉ាត់ ជ័ញ (Al-Nuseirat Joint ) ដែលមាន​ទីតាំង​នៅ​ជំរំ​ជន​ភៀស​ខ្លួន​ អាល់ នូសេរ៉ាត់ (Al-Nuseirat) គឺ​ជា​សាលា​មួយ​គ្រប់​គ្រង​ដោយ​អង្គការ​សហ​ប្រជាជាតិ​ដែល​បាន​ផ្តល់​កន្លែង​ជ្រកកោន។ គ្រួសារជាច្រើនបានស្វែងរកទីជម្រកនៅទីនេះ បន្ទាប់ពីបាន​ភៀស​ខ្លួន​ពី​ការ​បាញ់​ផ្លោង​លើសាលារៀនផ្សេងទៀត គ្រប់គ្រងដោយទីភ្នាក់ងារជំនួយ និងការងារ​របស់​អង្គការ​សហប្រជាជាតិ៕