ចំនួនអ្នកជម្លៀសចេញពីតំបន់ហ្កាហ្សាស្ទ្រីបឆ្លងកាត់ប្រទេសអេហ្ស៊ីប បានកើនឡើង កាល​ពី​ថ្ងៃ​អង្គារ មួយថ្ងៃបន្ទាប់ពីច្រកព្រំដែនRafahនេះ ត្រូវបានបើកឡើងវិញ។

ប្រភព​សន្តិសុខអេហ្ស៊ីប បាននិយាយថា យ៉ាងហោចណាស់មនុស្ស ៥០០នាក់ ដែល​ភាគ​ច្រើន​ជា​ជនបរទេស ឬមានសញ្ជាតិពីរ និងអ្នកនៅក្នុងបន្ទុករបស់ពួកគេ បានឆ្លងកាត់តាមច្រកព្រំដែន Rafah ដែលជាច្រកឆ្លងកាត់តែមួយគត់ ដែលមិនជាប់ព្រំដែនអ៊ីស្រាអែល។

ការជម្លៀស​ចេញតាមច្រកឆ្លងកាត់នេះ ត្រូវបានផ្អាកកាលពីថ្ងៃសៅរ៍ និងថ្ងៃអាទិត្យ បន្ទាប់ពីការ​វាយ​ប្រហាររបស់​អ៊ីស្រាអែល​លើ​រថយន្ត​សង្គ្រោះ​បន្ទាន់​ដែល​កំពុង​ធ្វើ​ដំណើរ​ទៅ​កាន់​ទី​ក្រុង​Rafah។ ប្រភពសន្តិសុខអេហ្ស៊ីប បាននិយាយថា អេហ្ស៊ីប​កំពុងបន្ត​ដាក់​សម្ពាធ​ឲ្យ​មាន​ការ​បង្កើន​ជំនួយ និងប្រេងឥន្ធនៈចូលទៅក្នុងតំបន់ហ្កាហ្សាស្ទ្រីប និងសន្តិសុខសម្រាប់រថយន្តសង្គ្រោះ។

ក្រសួង​ការបរទេសរបស់ប្រទេសហ្ស៊កដានី បាននិយាយថា ជនជាតិហ្ស៊កដានីចំនួន ២៦២ នាក់ ត្រូវ​បាន​ជម្លៀសចេញកាលពីថ្ងៃអង្គារ ក្នុងចំណោមចំនួនសរុប៥៦៩នាក់ ដែលបានជាប់គាំង នៅ​ក្នុង​តំបន់ហ្កាហ្សា បន្ទាប់ពីមានការផ្ទុះការប្រយុទ្ធ នៅទីនោះ។

ប្រទេសកាណាដា បាននិយាយថា ពលរដ្ឋរបស់ខ្លួនចំនួន ៥៩នាក់ អ្នករស់នៅអចិន្ត្រៃយ៍ និង​សមាជិក​គ្រួសារ ត្រូវបានជម្លៀសចេញហើយ។