លោក Balázs Orbán ប្រធានផ្នែកនយោបាយរបស់់នាយករដ្ឋមន្ត្រីហុងគ្រី បាននិយាយថា ទីក្រុង ប៊ុយដាប៉េស (Budapest) នឹងរារាំង​ការ​ចាប់​ផ្តើមការ​ចរចា​ជាមួយ​អ៊ុយក្រែន​អំពី​ការ​ចូលជា​សមាជិកសហភាពអឺរ៉ុប រហូតដល់តម្រូវការរបស់ហុងគ្រីទាក់ទងនឹងភាសានៃការអប់រំ ត្រូវបានបំពេញ។

លោក​បាននិយាយថា ហុងគ្រីតែង​តែជា​អ្នកគាំទ្រ​ការ​សម្រប​សម្រួល​របស់​អ៊ុយក្រែន​ជា​មួយ​សហភាព​អឺរ៉ុប ប៉ុន្តែលោក បានបន្ថែមថា ច្បាប់ភាសា តឹងតែងបានផ្លាស់ប្តូរអ្វីៗទាំងអស់។

លោក Orbán បានបន្ថែមថា៖«យើងនឹងរារាំងវារហូតដល់បញ្ហាត្រូវបានដោះស្រាយ» ដោយឆ្លើយ​ថា​តើ​ហុងគ្រី នឹងរារាំង​ការ​ចាប់​ផ្តើម​ការ​ចរចា​ ស្តីពី​ការ​ចូល​ជា​សមាជិក​សហភាព​អឺរ៉ុប​របស់​អ៊ុយ​ក្រែន​ដែរ​ឬទេ។

លោក Orbán បានថ្លែងថា៖«ច្បាប់ថ្មីបានធ្វើឲ្យជីវិតរបស់ជនជាតិហុងគ្រីនៅអ៊ុយក្រែន មិន​អាច​ទ្រាំ​ទ្រ​បាន ។ លោកនិយាយសំដៅទៅលើច្បាប់ដែលត្រូវបានណែនាំថ្មីៗនេះ នៅក្នុង​ប្រទេស​អ៊ុយក្រែន ដែលតម្រូវឲ្យជនជាតិភាគតិច មិនត្រឹមតែជនជាតិហុងគ្រីប៉ុណ្ណោះទេ ដើម្បី​ទទួល​បាន​ការ​អប់រំ​យ៉ាងហោចណាស់ ៧០ភាគ រយជាភាសាអ៊ុយក្រែន។ ដូច្នេះ ហុងគ្រីបារម្ភថា កុមា​រ​ដែល​ធំ​ធាត់​ក្នុង​គ្រួសារនិយាយភាសាហុងគ្រីក្នុងប្រទេសអ៊ុយក្រែន នឹងមាន​ការ​លំបាក​ពេល​កំពុង​សិក្សា​។

លោក​Balázs Orbán ថា៖«យើងមិនអាចដោះស្រាយបញ្ហានេះ បានទេ»។

លោក​បាន​សង្កត់ធ្ងន់ថា៖«ជំហររបស់ហុងគ្រី គឺច្បាស់ណាស់៖ ដរាបណាច្បាប់នេះនៅមាន មិន​អាចមាន​ការ​ពិភាក្សាជាមួយប្រជាជនអ៊ុយក្រែនអំពីសមាហរណកម្មរបស់ពួកគេ ទៅក្នុង​សហភាព​អឺរ៉ុបទេ»។