​បាល់ទាត់៖ ​បន្ទាប់ពី​អេ​ស្ប៉ា​ញ មាន​ស៊ុយអែត​មួយទៀត​ដែល​រងគ្រោះ​ដោយ Covid-19 មុន Euro ២០២០ មកដល់​បន្ទាប់ពី​កីឡាករ​ពីរ​នាក់​តេស្ត​វិជ្ជមាន Covid-19 បី​ថ្ងៃមុន Euro មកដល់​។​ ​កីឡាករ​របស់ Juventus, Dejan Kulusevski ត្រូវ​តេស្ត​វិជ្ជមាន​ភ្លាមៗ ​បន្ទាប់ពី​បាន​ប្រាប់​ក្រុម​ពេទ្យ​ថា ​ខ្លួន​មាន​អ​ការៈសង្ស័យ​។​

​​Kulusevski នឹង​បន្ត​ស្នាក់នៅ​ទីក្រុង Stockholm ខណៈ​កីឡាករ​ក្នុង​ក្រុម​ផ្សេងទៀត​ធ្វើដំណើរ​ទៅ​ទីក្រុង Gothenburg​។ ​ក្រោយមក​ការចាប់ផ្តើម​ហ្វឹកហាត់​នៅ​ទីក្រុង Gothenburg ខ្សែបំរើ Bologna ម្នាក់ទៀត Mattias Svanverg មិនបាន​ចូលរួម​ការហ្វឹកហាត់ និង​ទៅ​ជួប​ពេទ្យ​របស់​ក្រុម​ដើម្បី​ធ្វើការ​តេស្ត​សំណាក ក៏​ចេញ​លទ្ធផល​វិជ្ជមាន​មួយទៀត​។​ ​Mattias Svanberg នៅ​ពេលនេះ​កំពុង​នៅ​ដាច់​ដោយឡែក​ម្នាក់ឯង​ក្នុង​បន្ទប់​សណ្ឋាគា​។​

​​មកដល់ពេលនេះ​ស៊ុយអែត​មិនបាន​កោះហៅ​កីឡាករ​ផ្សេងទៀត ​ជំនួស​កីឡាករ​ទាំងពីរ​ឡើយ ស្រប​ពេល​ក្រុម​កំពុង​ពិភាក្សា​រក​ដំណើរ​ស្រាយ ​ខណៈដែល Euro ២០២០ កាន់តែ​កៀក​។ ស៊ុយ​អែត​នឹង​ចាប់ផ្តើម Euro ២០២០ នៅ​ថ្ងៃ​ទី​១៥ ក្នុង​ពូ​ល E ជួប​ជាមួយ​អេ​ស្ប៉ា​ញ មុន​បន្ត​ជួប​ស្លូ​វ៉ា​គី និង​ចុង​ក្រោយ​ជួប​ប៉ូឡូញ​៕

​អត្ថបទ​៖​នាង សុភា​វុ​ធ