កីឡាការិនីប៊ីយ៉ា និងស្នូកឃ័រជម្រើសជាតិ ស្រួង ភាវី បានទទួលពានរង្វាន់ពិសេសអាស៊ី (Asia Special Award 2023) ដែលរៀបចំដោយស្ថាប័ន Asian Model Festival នៃ​ប្រទេស​កូរ៉េ​ខាង​ត្បូង​ ហើយបានចាត់ទុកសមិទ្ធផលនេះ គឺជាកិត្តិយសដ៏ថ្លៃថ្លាមួយទៀត សម្រាប់​ខ្លួន​ក្នុង​នាម​ពលរដ្ឋ​កម្ពុជា លើឆាកអន្ដរជាតិ ។

លោកស្រីបានបញ្ជាក់ថា ខ្លួនត្រូវបានជ្រើសរើសឲ្យទទួលពានរង្វាន់ Asia Special Award 2023 កាល​ពី​ចុងសប្ដាហ៍កន្លងទៅ ហើយលោកស្រី ពិតជារំភើបប្រកបដោយសេចក្ដីសោមនស្សរីករាយ និង​មានមោទនភាពជាខ្លាំង នៅពេលគេហៅថា Cambodia Cambodia តំណាងដោយខ្លួន ឡើង​លើ​វេទិកា ដើម្បីទទួលពានរង្វាន់ដ៏មានអត្ថន័យ និងកិត្តិយសនេះ ។

ម្ចាស់មេដាយមាសស៊ីហ្គេមរូបនេះ បន្ដទៀតថា រាល់សមិទ្ធផលទាំងប៉ុន្មាន ខ្លួន​បាន​ឧទ្ទិស​រួច​ហើយ គឺដាក់ជារបស់រួមសម្រាប់ប្រជាជនកម្ពុជាទាំងអស់ និងប្រទេសជាតិទាំងមូល ។ ភាវី សង្ឃឹម​ថា រាល់ភាពជោគជ័យដែលកូនខ្មែរទទួលបាន សូមគាំទ្រ ស្រលាញ់ ផ្ដល់តម្លៃ ផ្ដល់​កម្លាំង​ចិត្ត និងលើកស្ទួយដល់ពួកគេ ដែលបាន នឹងកំពុងខិតខំប្រឹងប្រែងយ៉ាងខ្លាំង ទម្រាំ​ទទួល​បាន​ជោគជ័យ​ដ៏​ត្រចះត្រចង់លើឆាកអន្ដរជាតិ ។

គួរដឹងថា កាលពីដើមខែតុលាកន្លងទៅ កីឡាការិនីជម្រើសជាតិមានដើមកំណើតពីខេត្តត្បូងឃ្មុំ និង​កំពុងរស់នៅជាមួយស្វាមីជនជាតិកូរ៉េរូបនេះ ក៏ទើប​ទទួល​បាន​កិត្តិយស​ពី​រដ្ឋាភិបាល​សាធារណ​រដ្ឋ​កូរ៉េ ដោយក្លាយជាស្ដ្រីខ្មែរតែម្នាក់គត់ ដែលទទួល​បាន​ពាន​រង្វាន់​វប្បធម៌​បង្រួប​បង្រួម​ជាតិ​ពហុវប្បធម៌ និងពានរង្វាន់ពីក្រសួងព័ត៌មាន សម្រាប់ការលើកទឹកចិត្តដល់លោកស្រី ស្រួង ភាវី ដែលខិតខំ និងលះបង់ ទាំងក្នុងវិស័យកីឡា និងសកម្មភាពសប្បុរសធម៌នានាផងដែរ៕ អត្ថបទ៖ លី ឈុនឡា