ប៉ាឡេស្ទីន ៖ មេដឹកនាំនៃអាជ្ញាធរប៉ាឡេស្ទីននិយាយថា បណ្ដាមេដឹកនាំអន្តរជាតិត្រូវតែអំពាវនាវជាបន្ទាន់ដល់អ៊ីស្រាអែលឲ្យបញ្ឈប់នូវអ្វី ដែលលោកហៅថាជាអំពើប្រល័យពូជសាសន៍ប្រឆាំងនឹងប្រជាជនរបស់លោក។ នេះជាការលើកឡើងរបស់លោក Mohammad Shtayyeh នៅក្នុងបទសម្ភាសន៍ផ្តាច់មុខជាមួយទូរទស្សន៍ NHK កាលពីថ្ងៃចន្ទ (ទី៦ ខែវិច្ឆិកា)។

លោក Shtayyeh បានពណ៌នាពីការវាយប្រហាររបស់អ៊ីស្រាអែលថាជាការរំលោភច្បាប់អន្តរជាតិ។ ហើយលោកបានបន្ថែមថា «ជនជាតិអាមេរិកកំពុងអំពាវនាវឲ្យមានបទឈប់បាញ់ក្នុងបុព្វហេតុមនុស្សធម៌ តែយើងគិតថា នោះមិនទាន់គ្រប់គ្រាន់ទេ» ដោយបានសង្កត់ធ្ងន់ថា «សង្រ្គាមគួរតែបញ្ឈប់ភ្លាមឥឡូវនេះ»។

លោក Shtayyeh បានប្រាប់ថា ស្ថានភាពបច្ចុប្បន្ននៅក្នុងតំបន់ហ្កាហ្សា គឺជា«មហន្តរាយដ៏ធ្ងន់ធ្ងរ» ជាមួយនឹងអ្វី ដែលលោកបានពិពណ៌នាថាជា «ការសម្លាប់ជាប្រព័ន្ធ» ដែលបានកើតឡើង។ លោកក៏បានបញ្ជាក់ទៀតដែរថា «អ្នករបួសមិនអាចចូលមន្ទីរពេទ្យបាន ហើយមន្ទីរពេទ្យក៏គ្មានថ្នាំ សម្រាប់ព្យាបាលដែរ»។

មេដឹកនាំរូបនេះ បានលើកឡើងថា តំបន់ហ្កាហ្សាត្រូវការឡានដឹកទំនិញចំនួន ៥០០គ្រឿងជារៀងរាល់ថ្ងៃ ដើម្បីទ្រទ្រង់ជីវិតរបស់ប្រជាជន និងដើម្បីផ្តល់ទីជម្រក និងទឹកបរិភោគ។

សូមបញ្ជាក់ថា រយៈពេល ១ខែ បានកន្លងផុតទៅហើយ ចាប់តាំងពីការប៉ះទង្គិចគ្នា បានចាប់ផ្តើមកើតឡើង រវាងក្រុមហាម៉ាស និងអ៊ីស្រាអែល។ តំបន់និគមជនប៉ាឡេស្ទីននៅតែបែងចែក រវាងអាជ្ញាធរប៉ាឡេស្ទីន ដែលគ្រប់គ្រងតំបន់វេសប៊ែង និងក្រុមហាម៉ាសដែលគ្រប់គ្រងតំបន់ហ្កាហ្សាស្ទ្រីប៕