នៅក្នុងករណីដ៏សំខាន់ចុងក្រោយបង្អស់ដើម្បីសាកល្បងឆន្ទៈរបស់ពួកអភិរក្សនិយមភាគច្រើន ក្នុងការបន្ថែមសិទ្ធិកាន់កាប់កាំភ្លើងនោះ ចៅក្រមតុលាការកំពូលរបស់សហរដ្ឋអាមេរិក កាលពីថ្ងៃអង្គារ (ទី៧ ខែវិច្ឆិកា) ហាក់ដូចជាមានទំនោរក្នុងការរក្សាភាពស្របច្បាប់នៃច្បាប់សហព័ន្ធ ដែលចាត់ទុកថា ជាអំពើឧក្រិដ្ឋ សម្រាប់អ្នកនៅក្រោមដីកាហាមឃាត់មិនឲ្យបង្កអំពើហិង្សាក្នុងគ្រួសារ ដែលមានកាំភ្លើងកាន់កាប់។

ចៅក្រមបានស្ដាប់ទឡ្ហីករណ៍ នៅក្នុងបណ្តឹងឧទ្ធរណ៍មួយដោយរដ្ឋបាលរបស់ប្រធានាធិបតីអាមេរិក លោក Joe Biden ជំទាស់នឹងសេចក្តីសម្រេចរបស់តុលាការជាន់ទាប ក្នុងការលុបចោលច្បាប់ ដែលត្រូវបានតាក់តែងឡើង ដើម្បីការពារជនរងគ្រោះពីការរំលោភបំពានក្នុងគ្រួសារ ដោយលើកឡើងថា វាជាការរំលោភលើការធានានៃវិសោធនកម្មលើកទី២ ជុំវិញសេរីភាព ក្នុងការ «រក្សា និងកាន់កាប់អាវុធ»។

តុលាការបណ្ដឹងឧទ្ធរណ៍ទី៥ ដែលមានមូលដ្ឋាននៅទីក្រុង New Orleans របស់សហរដ្ឋអាមេរិក បានសម្រេចថា វិធានការនេះ បានបរាជ័យក្នុងការធ្វើតេស្តយ៉ាងម៉ត់ចត់ ដែលកំណត់ដោយតុលាការកំពូល នៅក្នុងសេចក្តីសម្រេចឆ្នាំ២០២២ ដែលតម្រូវឲ្យច្បាប់កាន់កាប់កាំភ្លើង «អនុលោមតាមប្រពៃណីប្រវត្តិសាស្ត្ររបស់ប្រទេសនៃបទប្បញ្ញត្តិអាវុធ» ដើម្បីធ្វើឲ្យរស់ឡើងវិញនូវបញ្ហាប្រឈមនៃវិសោធនកម្មលើកទី២។

ចៅក្រមអភិរក្សមួយចំនួន ដែលមានសំឡេងភាគច្រើន ៦-៣ បានចោទសួរអំពីវិសាលភាពនៃអំណះអំណាងរបស់រដ្ឋបាលថា ក្រោមវិសោធនកម្មលើកទី២ អ្នកដែលមិន «គោរពច្បាប់ និងទទួលខុសត្រូវ» ជាប្រភេទដែលរាប់បញ្ចូលទាំងអ្នករំលោភបំពានក្នុងគ្រួសារផង អាចត្រូវបានរារាំងមិនឲ្យមានកាន់កាប់កាំភ្លើង។

តែទោះជាយ៉ាងណាក៏ដោយ សំណួរមួយចំនួនរបស់ចៅក្រុមទាំងនោះ បានបង្ហាញពីការបើកចំហរ ក្នុងការស្វែងរកច្បាប់ឲ្យស្របទៅនឹងវិសោធនកម្មលើកទី២ ដោយអនុវត្តស្តង់ដារ ដែលនឹងដកហូតអាវុធរបស់អ្នកដែលត្រូវបានចាត់ទុកថា មានគ្រោះថ្នាក់ ជាជាងគ្រាន់តែចោទថា មានការធ្វេសប្រហែស៕