ជប៉ុន បានបញ្ជាក់សារជាថ្មីថា ការគាំទ្ររបស់ក្រុមប្រទេសមានឧស្សាហកម្មលូតលាស់ G7សម្រាប់អ៊ុយក្រែននៅក្នុងសង្រ្គាមរបស់ពួកគេជាមួយរុស្ស៊ី នឹងមិនប៉ះពាល់ដោយសារជម្លោះដ៏តានតឹងនៅតំបន់មជ្ឈិមបូព៌ានោះទេ ស្របពេលដែលរដ្ឋមន្រ្តីការបរទេសរបស់ក្រុមប្រទេសមួយនេះ បានជជែកគ្នាតាមអនឡាញជាមួយទីក្រុងគីវ អំឡុងជំនួបនៅថ្ងៃពុធនេះ ក្នុងទីក្រុងតូក្យូ ។

 អំឡុងជំនួបដែលរដ្ឋមន្រ្តីការបរទេសអ៊ុយក្រែនលោក Dmytro Kuleba ចូលរួមពីចម្ងាយនោះ រដ្ឋមន្រ្តីការបរទេសជប៉ុនលោក Yoko Kamikawa និយាយថា ក្នុងនាមជាក្រុមប្រទេស G7 ពួកយើងនឹងឈរខាងអ៊ុយក្រែន បើទោះបីជា ចំណាប់អាម្មណ៍អន្តរជាតិ បានងាកទៅតំបន់មជ្ឈិមបូព៌ាក៏ដោយ ។

 មន្រ្តីជាន់ខ្ពស់មួយរូបរបស់សហរដ្ឋអាមេរិក ធ្លាប់បាននិយាយក្រោយក្រុមរដ្ឋមន្រ្តីការបរទេសប្លុកមួយនេះ ជួបគ្នាកាលពីខែកញ្ញាថា ក្រុមប្រទេស G7ទទួលស្គាល់ថា រុស្ស៊ីធ្វើសង្រ្គាមនៅអ៊ុយក្រែនរយៈពេលយូរ ហើយនេះត្រូវការការគាំទ្រសេដ្ឋកិច្ច និងយោធាដ៏អត់ធ្មត់សម្រាប់ទីក្រុងគីវ ។

 ក្រុមប្រទេសមួយនេះ ស្ថិតនៅជួរមុខនៃទណ្ឌកម្មលើរុស្ស៊ី ចាប់តាំងពីទីក្រុងម៉ូស្គូ បើកការវាយលុករបស់ពួកគេលើអ៊ុយក្រែន កាលពីខែកុម្ភៈ ឆ្នាំ ២០២២ ក្នុងនោះប្រធានាធិបតីអ៊ុយក្រែន លោក Volodymyr Zelenskiy បានបង្ហាញខ្លួនដ៏គួរភ្ញាក់ផ្អើលនៅកិច្ចប្រជុំកំពូលក្រុមមេដឹកនាំប្រទេស G7 នៅទីក្រុង Hiroshima ប្រទេសជប៉ុន កាលពីខែឧសភា ៕