ក្រសួងការបរទេសចិន នៅថ្ងៃពុធ (ទី៨ ខែវិច្ឆិកា) នេះ បានឲ្យដឹងថា កិច្ចពិភាក្សា រវាងមេដឹកនាំនៃប្រទេសចិន និងអូស្ត្រាលី គឺ «ប្រកបដោយភាពទូលំទូលាយ ស៊ីជម្រៅ មិត្តភាព និងផ្លែផ្កា»។

នៅឯសន្និសីទសារព័ត៌មាន ដែលតែងធ្វើប្រចាំនៅទីក្រុងប៉េកាំង អ្នកនាំពាក្យក្រសួងការបរទេសចិន លោក Wang Wenbin បាននិយាយថា៖ «ប្រទេសចិនមានឆន្ទៈក្នុងការធ្វើការជាមួយប្រទេសអូស្ត្រាលី ដើម្បីប្រកាន់ខ្ជាប់នូវការគោរពគ្នាទៅវិញទៅមក សមភាព និងផលប្រយោជន៍គ្នាទៅវិញទៅមក ហើយស្វែងរកមូលដ្ឋានរួម ខណៈដែលបន្តរក្សាភាពខុសគ្នា»។

នាយករដ្ឋមន្ត្រីអូស្ត្រាលីលោក Anthony Albanese បានជួបជាមួយប្រធានាធិបតីចិន លោក Xi Jinping នៅថ្ងៃចន្ទ (ទី៦ វិច្ឆិកា) និងនាយករដ្ឋមន្ត្រីលោក Li Qiang នៅថ្ងៃអង្គារ (ទី៧ វិច្ឆិកា) ដោយចាប់ផ្តើមឡើងវិញនូវកិច្ចសន្ទនារបស់មេដឹកនាំប្រចាំឆ្នាំ ដែលលោក Albanese បាននិយាយថា នឹងបន្តនៅពេលដែលទំនាក់ទំនង រវាងប្រទេសដៃគូពាណិជ្ជកម្មទាំង២ ត្រូវបានធ្វើឲ្យមានលំនឹង។

គួរបញ្ជាក់ដែរថា លោក Albanese គឺជាមេដឹកនាំអូស្ត្រាលីដំបូងគេ ដែលបានទៅបំពេញទស្សនកិច្ច នៅទីក្រុងប៉េកាំង ក្នុងរយៈពេល ៧ឆ្នាំ បន្ទាប់ពីជម្លោះការទូត បានធ្វើឲ្យមានការផ្អាកកិច្ចប្រជុំប្រចាំឆ្នាំ រវាងមេដឹកនាំប្រទេសទាំង២៕