នៅថ្ងៃអង្គារនេះ តុលាការកំពូលឥណ្ឌា បានបញ្ជាក្រុមអាជ្ញាធរឲ្យនៅតាមរដ្ឋជុំវិញរដ្ឋធានីញូវដែល្លី ទៅបញ្ឈប់ការដុតកាកសំណល់កសិកម្ម រួមទាំងជ្រាំងស្រូវរបស់ក្រុមប្រជាកសិករ ស្របពេលដែលគុណភាពខ្យល់ពីផ្សែងអ័ព្ទដែលហ៊ុព័ទ្ធរដ្ឋធានីមានខ្យល់កខ្វក់បំផុតរបស់ពិភពលោកមួយនេះ ឈានដល់កម្រិតគ្រោះថ្នាក់រយៈពេល ១សប្តាហ៍មកហើយ ។

កម្រិតគុណភាពខ្យល់ធ្លាក់ចុះរាល់ឆ្នាំមុនរដូវរងារ ពេលដែលខ្យល់ត្រជាក់ និងខ្យល់ស្ងប់ទាក់ធូលីពុល កើតចេញពីប្រភពជាច្រើន រួមទាំងរថយន្ត ឧស្សាហកម្ម ធូលីសំណង់ និងការដុតកាកសំណល់កសិកម្ម ។

តុលាការបានចេញបទបញ្ជាស្រដៀងគ្នាកាលពីប៉ុន្មានឆ្នាំកន្លងទៅ ដើម្បីកំហិតផលប៉ះពាល់ ស្របពេលដែលក្រុមអាជ្ញាធររដ្ឋ រាយការណ៍អសមត្ថភាពក្នុងការគ្រប់គ្រងការដុតកាកសំណល់កសិកម្ម បើទោះបីជាមានការផាកពិន័យយ៉ាងណាក៏ដោយ ហើយជួនកាលដោយសារតែការបង្កជម្លោះរបស់ក្រុមប្រជាកសិករមកលើក្រុមមន្រ្តី ។

លោក Gopal Rai គឺជារដ្ឋមន្រ្តីក្រសួងបរិស្ថានក្រុងញូវដែល្លី និយាយថា រដ្ឋាភិបាលក្នុងស្រុកនៅទីក្រុងដែល្លី នឹងអនុវត្តន៍បទបញ្ជារបស់តុលាការកំពូល ។

ទីក្រុងដែល្លី បានបញ្ឈប់សំណង់ក្នុងស្រុក បិទសាលាបឋមសិក្សា រហូតដល់ថ្ងៃទី ១០ ខែវិច្ឆិកា ហើយនិងអនុវត្តន៍ការរឹតបន្តឹងលើការប្រើប្រាស់យានជំនិះនៅសប្តាហ៍ក្រោយ ដើម្បីប្រយុទ្ធប្រឆាំងនឹងខ្យល់កខ្វក់ ប៉ុន្តែពួកគេចង់ឲ្យរដ្ឋជិតខាង គ្រប់គ្រងការដុតកាកសំណល់កសិកម្មផងដែរ ៕