បង់ក្លាដែស ៖ យ៉ាងហោចណាស់ស្ត្រីម្នាក់ត្រូវបានសម្លាប់ នៅក្នុងប្រទេសបង់ក្លាដែស នៅពេលដែលនគរបាល បានប្រើឧស្ម័នបង្ហូរទឹកភ្នែក និងគ្រាប់កាំភ្លើងជ័រ ហើយក្រុមអ្នកតវ៉ាបានគប់ដុំថ្ម ខណៈដែលបាតុកម្មរបស់កម្មករកាត់ដេរ ដែលទាមទារដំឡើងប្រាក់ឈ្នួល បានប្រែក្លាយទៅជាអំពើហិង្សា នៅថ្ងៃពុធ (ទី៨ ខែវិច្ឆិកា) នេះ។

ការស្លាប់ចុងក្រោយបង្អស់នេះ គឺជាអ្នកស្លាប់ទី៣ ហើយ គិតចាប់តាំងពីការតវ៉ាបានផ្ទុះឡើង កាលពីសប្តាហ៍មុន។ កាលពីថ្ងៃអង្គារ រដ្ឋាភិបាលបាននិយាយថា ប្រាក់ឈ្នួលអប្បបរមានឹងឡើង ៥៦,២៦ភាគរយ ពោលគឺឡើងដល់ ១២.៥០០តាកា (១១៤ដុល្លារអាមេរិក) ក្នុង ១ខែ ចាប់ពីថ្ងៃទី១ ខែធ្នូ ដែលជាការដំឡើងលើកដំបូង ក្នុងរយៈពេល ៥ឆ្នាំ ប៉ុន្តែកម្មករកំពុងទាមទារស្ទើរតែ ២ដងនៃចំនួនដែលបានផ្តល់ឲ្យនេះ។

នគរបាលបានប្រាប់ថា ពួកគេបានប្រើឧស្ម័នបង្ហូរទឹកភ្នែក និងគ្រាប់កាំភ្លើងជ័រ ដើម្បីបំបែកការតវ៉ារបស់កម្មកររាប់រយនាក់ ដែលបានដើរតាមផ្លូវ ក្នុងមជ្ឈមណ្ឌលកាត់ដេរ Gazipur នៅជាយក្រុង Dhaka។ មន្ត្រីនគរបាល ក្នុងតំបន់ លោក Ashraf Uddin បាននិយាយថា៖ «កម្មករបានបិទផ្លូវ និងបំផ្លិចបំផ្លាញរថយន្តជាច្រើនគ្រឿង។ យើងត្រូវតែប្រើឧស្ម័នបង្ហូរទឹកភ្នែក គ្រាប់កាំភ្លើងជ័រ និងគ្រាប់បែកផ្សែង ដើម្បីបំបែកកម្មករមិនមានសណ្ដាប់ធ្នាប់ ដែលបានគប់ដុំឥដ្ឋមកលើពួកយើង»។

ការតវ៉ាត្រូវបានធ្វើឡើងស្របពេលជាមួយនឹងការមានបាតុកម្មដោយហិង្សាប្រឆាំងនឹងរដ្ឋាភិបាល ដែលទាមទារឲ្យលោកស្រី Sheikh Hasina ចុះចេញពីតំណែង និងទាមទារឲ្យមានការបោះឆ្នោតដោយសេរី និងយុត្តិធម៌ ក្រោមរដ្ឋាភិបាលចាំផ្ទះ៕