អ៊ីស្រាអែល៖ ក្រុមអ្នកនយោបាយអ៊ីស្រាអែល នឹងរៀបចំការបោះឆ្នោតផ្ដល់សេចក្ដីទុកចិត្តលើរដ្ឋាភិបាល ដឹកនាំដោយក្រុមប្រឆាំងនៅថ្ងៃអាទិត្យសប្ដាហ៍នេះ ជាវិធានការមួយមានន័យថា ប្រសិនបើការបោះឆ្នោតទទួលបានជោគជ័យនោះ នឹងបញ្ចប់តំណែងរបស់មេដឹកនាំកាន់តំណែងយូរបំផុតរបស់ប្រទេសនេះ គឺលោកនាយករដ្ឋមន្ត្រី Benjamin Netanyahu។
លោក Yariv Levin ប្រធានសភាអ៊ីស្រាអែល បានប្រកាសក្នុងសេចក្ដីថ្លែងការណ៍មួយថា ការជជែកដេញដោល និងការបោះឆ្នោតសម្រាប់រដ្ឋាភិបាលថ្មី នឹងធ្វើឡើងនៅថ្ងៃអាទិត្យទី១៣ ខែមិថុនា ឆ្នាំ២០២១ អំឡុងសម័យប្រជុំសភាពិសេស ដែលខ្លួនរំពឹងថានឹងដឹកនាំឲ្យមានពិធីស្បថចូលកាន់តំណែងនៅថ្ងៃជាមួយគ្នា។ មេដឹកនាំក្រុមប្រឆាំង លោក Yair Lapid កៀរគរបានគណបក្សរបស់អ៊ីស្រាអែលចំនួន ៨ ដែលមានមនោគមន៍វិជ្ជានយោបាយខុសគ្នា ដើម្បីបង្កើតអ្វីដែលលោកហៅថា ជាការផ្លាស់ប្ដូររដ្ឋាភិបាល ដែលមានគោលបំណងទម្លាក់តំណែងលោក Netanyahu ដែលបានកាន់តំណែងរយៈពេល ១២ឆ្នាំមកនេះ៕
អត្ថបទ៖ សុខមាន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
