មនុស្សប្រហែល ២.០០០នាក់ នៅប្រទេសអាល្លឺម៉ង់ បានដើរដង្ហែក្បួនក្នុងសភាពស្ងៀមស្ងាត់ពីវិហារកាតូលិក នៅទីក្រុង Cologne ទៅកាន់ព្រះវិហារជ្វីហ្វ នៅមុនថ្ងៃគម្រប់ខួប ៨៥ឆ្នាំនៃការសម្លាប់រង្គាលខែវិច្ឆិកា ដែលត្រូវបានគេស្គាល់ផងដែរថា ជា «Reichskristallnacht» ដែលជារលកនៃការសម្លាប់ជនជាតិជ្វីហ្វ ហើយនិងការឆក់ប្លន់ និងការបំផ្លិចបំផ្លាញទ្រព្យសម្បត្តិ ដែលបានកើតឡើង នៅថ្ងៃទី៩ ខែវិច្ឆិកា ឆ្នាំ១៩៣៨។

មេដឹកនាំប្រចាំរដ្ឋ North Rhine-Westphalian លោក Hendrik Wuest ដែលបានចូលរួមពិធីរំលឹកខួបនេះ កាលពីយប់ថ្ងៃពុធ (ទី៨ វិច្ឆិកា) បាននិយាយថា ពិធីរំលឹកនេះត្រូវបានធ្វើឡើង ក្នុងបំណងបញ្ជូនសញ្ញានៃសាមគ្គីភាពជាមួយជនរងគ្រោះពីការវាយប្រហាររបស់ពួកហាម៉ាស កាលពីថ្ងៃទី ៧ ខែតុលា នៅភាគខាងត្បូងអ៊ីស្រាអែល ក៏ដូចជាជាមួយប្រជាជនជ្វីហ្វ ដែលចាកចេញមកប្រទេសអាល្លឺម៉ង់ផងដែរ។ លោកបានបន្ថែមថា៖ «អ្នករស់នៅដោយសុវត្ថិភាព ក្នុងប្រទេសនេះ ហើយយើងត្រូវធ្វើអ្វីមួយពីវា»។

បន្ថែមពីលើនោះ លោក Wuest បានប្រាប់ថា រដ្ឋបាលលរបស់រដ្ឋ North Rhine-Westphalia នឹងតាមដានពិនិត្យមើលយ៉ាងយកចិត្តទុកដាក់ចំពោះបាតុកម្មស្អប់ខ្ពើម និងថា តើពួកគេអាចត្រូវបានដាក់កម្រិត ឬហាមឃាត់ ឬយ៉ាងណា។

នៅថ្ងៃព្រហស្បតិ៍ (ទី៩ ខែវិច្ឆិកា) នេះ អធិការបតីអាល្លឺម៉ង់លោក Olaf Scholz និងប្រធានាធិបតីលោក Frank-Walter Steinmeier ត្រូវបានគេរំពឹងថា នឹងធ្វើទស្សនកិច្ចនៅព្រះវិហារជ្វីហ្វ Kahal Adass Jisroel ដើម្បីជាការបង្ហាញការគាំទ្រ បន្ទាប់ពីមជ្ឈមណ្ឌលសហគមន៍ជ្វីហ្វ បានក្លាយជាគោលដៅនៃការវាយប្រហារដោយការដុត កាលពីខែមុន បើទោះបីជាមានការការពារពីនគរបាលក៏ដោយ៕