ភ្នំពេញ៖ សិស្សានុសិស្ស នៃសាលារៀនសុវណ្ណភូមិ នៅតាមរាជធានី-ខេត្ត ចំនួន៣០ទីតាំងថ្ងៃទី០៨ ខែមិថុនា ឆ្នាំ២០២១ បានចូលរួមប្រកួតប្រជែង «អំណាន» ពីចម្ងាយប្រចាំឆ្នាំ២០២១ ដើម្បីផ្តល់ឱកាសដល់ប្អូនៗបង្ហាញពីសមត្ថភាពក្រៅពីការសិក្សាតាមកម្មវិធីសិក្សាគោល បង្កើតវប្បធម៌ស្វ័យសិក្សា និងបណ្ដុះបំណិន និងទម្លាប់អានឲ្យសិស្សស្រលាញ់ចូលចិត្តការសិក្សាពេញមួយជីវិត។
បើតាមលោក ម៉ោញ សុផាត ប្រធានការិយាល័យសិក្សាធិការចំណេះទួទៅខ្មែរ នៃសាលារៀនសុវណ្ណភូមិ បានឲ្យដឹងថា កម្មវិធីប្រកួតនេះ មានបេក្ខជនចូលរួមចំនួន៩០រូប អាយុចាប់ពី៦ឆ្នាំ រហូតដល់៨ឆ្នាំ ដែលកំពុងសិក្សាថ្នាក់ទី១ ដល់ថ្នាក់ទី៣ ហើយត្រូវឆ្លងកាត់វគ្គជម្រុះ២ដំណាក់កាល ទម្រាំដល់វគ្គផ្តាច់ព្រ័ត្រនេះ។ សម្រាប់វគ្គផ្តាច់ព្រ័ត្រនេះដែរ បេក្ខជនដែលត្រូវចូលរួមក្នុងមួយកម្រិតថ្នាក់ មាន ០៩នាក់ ក្នុងនោះ ត្រូវជ្រើសរើសយកចំនួន០៥នាក់ ពីលេខ១ ដល់លេខ៥ ជាម្ចាស់ជយលាភី។
លោក ម៉ោញ សុផាត បានបញ្ជាក់ទៀតថា ឆ្លងកាត់ពីការចាប់ផ្តើម រហូតមកដល់ពេលនេះ សាលារៀនសុវណ្ណភូមិ មានបទពិសោធន៍ពេញលេញ ក្នុងការផ្តល់សេវាអប់រំប្រកបដោយគុណភាពទោះជារៀន និងបង្រៀនពីចម្ងាយក៏ដោយ ក៏ស្ថានភាពដូចក្នុងសាលារៀនផ្ទាល់ផងដែរ ទាំងម៉ោងចេញ ម៉ោងចូល និងមុខវិជ្ជាដែលត្រូវរៀន ជាពិសេសការប្រលងផ្សេងៗ និងការពង្រឹងវត្តមាន គឺជារឿងចាំបាច់បំផុតដែលសាលាត្រូវអនុវត្ត។
ក្រៅពីនោះ សាលារៀនសុវណ្ណភូមិ បានធ្វើទំនើបកម្មបន្ថែមទៀត សម្រាប់ការរៀន និងបង្រៀនពីចម្ងាយតាមរយៈ App របស់សាលារៀនសុវណ្ណភូមិ ដែលរៀបចំថ្នាក់រៀនបែបឌីជីថល មានសម្ភារ និងឯកសារសម្បូរបែប ជំនួយដល់ការរៀន និងបង្រៀនងាយស្រួលសម្រាប់គ្រូ និងសិស្ស ក្នុងការទាញយកឯកសារជំនួយផ្សេងៗ ជាពិសេសអ្នកអាណាព្យាបាលងាយស្រួលក្នុងការតាមដានការសិក្សា និងវត្តមានរបស់បុត្រធីតា។
សូមបញ្ជាក់ផងដែរថា អាហារូបករណ៍ដែលផ្តល់ជូនសម្រាប់បេក្ខជនជាប់ជយលាភី រួមមាន៖
.ចំណាត់ថ្នាក់លេខ១ ទទួលបានអាហារូបករណ៍ ១០០% មេដាយមាស និងសម្ភារសិក្សា
.ចំណាត់ថ្នាក់លេខ២ ទទួលបានអាហារូបករណ៍ ៩០% មេដាយប្រាក់ និងសម្ភារសិក្សា
.ចំណាត់ថ្នាក់លេខ៣ ទទួលបានអាហារូបករណ៍ ៨០% មេដាយសំរិទ្ធ និងសម្ភារសិក្សា
.ចំណាត់ថ្នាក់លេខ៤ ទទួលបានអាហារូបករណ៍ ៧០% សម្ភារសិក្សា
.ចំណាត់ថ្នាក់លេខ៥ ទទួលបានអាហារូបករណ៍ ៦០% សម្ភារសិក្សា
ការផ្តល់អាហារូបករណ៍ជូននេះ គឺសម្រាប់ ១ឆ្នាំសិក្សាពេញ សម្រាប់ឆ្នាំសិក្សា២០២១-២០២២ខាងមុខនេះ៕ អត្ថបទ៖ រដ្ឋា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
