ប៉ាស៊ីហ្វិក ៖ នាយករដ្ឋមន្រ្តីអូស្រ្តាលីលោក Anthony Albanese បាននិយាយកាលពីថ្ងៃពុធនៅកោះ Rarotonga ថា វេទិកាកោះប៉ាស៊ីហ្វិក ដែលជាប្លុកក្នុងតំបន់មានរដ្ឋសមាជិកចំនួន ១៨ប្រទេស បានពិភាក្សាលើបញ្ហាបម្រែបម្រួលអាកាសធាតុ បញ្ហាសន្តិសុខក្នុងតំបន់ និងសេដ្ឋកិច្ច ។ 

លាតសន្ធឹងលើផ្ទៃមហាសមុទ្រសរុប ៣០លានគ.មក្រឡា រវាសហរដ្ឋអាមេរិក និងអាស៊ី សមាជិកវេទិកាមួយនេះ និយាយថា ការឡើងកម្រិតទឹកសមុទ្រ និងព្យុះកាន់តែអាក្រក់ខ្លាំង បណ្តាលមកពីបម្រែបម្រួលអាកាសធាតុ គឺជាក្តីកង្វល់សន្តិសុខធំបំផុតរបស់ពួកគេ ។ 

អូស្រ្តាលី ដែលស្ថិតនៅក្នុងចំណោមប្រទេសនាំចេញធ្យូងថ្ម និងឧស្ម័នធំជាងគេបំផុតរបស់ពិភពលោក បានប្តេជ្ញាចិត្តកាត់បន្ថយការបំភាយឧស្ម័នចំនួន ៤៣ភាគរយនៅឆ្នាំ ២០៣០ ហើយនិងឈានដល់កម្រិតសូន្យនៅឆ្នាំ ២០៥០ ប៉ុន្តែពួកគេបានរងសំពាធពីបណ្តាប្រទេសកោះមួយចំនួននៅក្នុងមហាមសមុទ្រប៉ាស៊ីហ្វិក ឲ្យធ្វើរឿងបន្ថែមទៀតដើម្បីប្រយុទ្ធប្រឆាំងនឹងបម្រែបម្រួលអាកាសធាតុ តាមរយៈការបញ្ឈប់ការផលិតប្រេងឥន្ធនៈហ្វូស៊ីល ។ 

ចិន កោះតៃវ៉ាន់ និងសហរដ្ឋអាមេរិក ដែលបានបញ្ជូនគណៈប្រតិភូរបស់ពួកគេ ទៅកាន់កោះ Cook ផងដែរនោះ ស្ថិតនៅក្នុងចំណោមដៃគូ និងក្រុមសង្កេតវេទិកាប្រចាំឆ្នាំនេះ ។ ប្រទេសចំនួន ៤ក្នុងចំណោមសមាជិករបស់ពួកគេ មានទំនាក់ទំនងការទូតជាមួយកោះតៃវ៉ាន់ តែមិនមែនជាមួយទីក្រុងប៉េកាំងនោះឡើយ ។ 

ក្រុមមេដឹកនាំប៉ាពួ ញូវ ហ្គីណេ វ៉ានូអាទូ និងប្រទេសកោះសូឡូម៉ុន ពុំបានចូលរួមវេទិកាមួយនេះឡើយ ជាហេតុបង្កការលំបាកសម្រាប់ការបង្រួបបង្រួមក្នុងតំបន់ ស្របពេលដែលមានការប្រកួតប្រជែងដណ្តើមឥន្ធិពលរវាងចិន និងសហរដ្ឋអាមេរិក ។ ប្រទេសសមាជិកទាំងអស់ នឹងចូលរួមកិច្ចប្រជុំរហូតដល់ថ្ងៃសុក្រស្អែក ៕