ប្រធានផ្នែកជំនួយសង្គ្រោះរបស់អង្គការសហប្រជាជាតិ ឬUN លោក Martin Griffiths នៅថ្ងៃព្រហស្បតិ៍ (ទី៩ ខែវិច្ឆិកា) បាននិយាយថា ជម្លោះនៅតំបន់ហ្កាហ្សា គឺប្រៀបដូចជាចំហេះព្រៃ ដែលអាចរាលដាលពាសពេញតំបន់ ដោយលោកបន្ថែមថា ការបណ្ដោយឲ្យស្ថានការណ៍នេះបន្តមាននៅក្នុងតំបន់ហ្កាហ្សា នឹងទទួលបាន «ការសើចចំអក» ជាមិនខាន។

ជាមួយគ្នានេះ នៅពេលចាប់ផ្តើមនៃសន្និសីទមនុស្សធម៌ស្តីពីវិបត្តិនៅតំបន់ហ្កាហ្សា នាទីក្រុងប៉ារីស ប្រទេសបារាំង លោកប្រធានរូបនេះ ក៏បានលើកឡើងផងដែរថា៖ «អង្គការសហប្រជាជាតិ មិនអាចជាផ្នែកនៃសំណើឯកតោភាគី ដើម្បីជួយជំរុញប្រជាជនប៉ាឡេស្ទីនឲ្យចូលទៅក្នុងតំបន់ ដែលគេហៅថា តំបន់សុវត្ថិភាពនោះបានឡើយ»។

សូមបញ្ជាក់ថា ពេលនេះ ប្រទេស និងអង្គការអន្តរជាតិប្រមាណ ៨០ កំពុងជួបប្រជុំគ្នានៅទីក្រុងប៉ារីស នាថ្ងៃព្រហស្បតិ៍នេះ ដើម្បីរៀបចំជំនួយ និងថ្លឹងថ្លែងអំពីវិធី ដើម្បីជួយអ្នករបួស ក្នុងតំបន់ហ៊ុមព័ទ្ធប៉ាឡេស្ទីនរបស់តំបន់ហ្កាហ្សា ទោះបីជាសម្រាប់លទ្ធផលជាក់ស្តែង មានការរំពឹងទុកទាបថា គ្មានការផ្អាកប្រយុទ្ធខ្លះក៏ដោយ។

លោក Jan Egeland អគ្គលេខាធិការក្រុមប្រឹក្សាជនភៀសខ្លួនន័រវ៉ែស បាននិយាយថា បទឈប់បាញ់ជាបន្ទាន់ នៅតំបន់ហ្កាហ្សា គឺជាភាពចាំបាច់ដាច់ខាត។ ប្រធានអង្គការគ្រូពេទ្យគ្មានព្រំដែន (MSF) លោកស្រី Isabelle Defourny បានហៅតំបន់សុវត្ថិភាពនៅហ្កាហ្សាភាគខាងត្បូងថា ជា «តំបន់សុវត្ថិភាពក្លែងក្លាយ»៕