កំពត៖ បន្ទាប់ពីទទួលដំណឹងព្រឹទ្ធាចារ្យចាប៉ីដងវែងលោកតា គង់ ណៃ ជំងឺចាស់បានរើឡើងវិញ កាលថ្ងៃទី៩ខែវិច្ឆិកា ឆ្នាំ២០២៣សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទ ក្រហម កម្ពុជា បានចាត់ឯកឧត្តមវេជ្ជ. អ៊ុយ សំអាត នាយកនាយកដ្ឋាន គ្រប់គ្រងគ្រោះមហន្តរាយ កាកបាទ ក្រហមកម្ពុជា អញ្ជើញទៅសួរសុខទុក្ខដល់គេហដ្ឋាន ព្រឹទ្ធាចារ្យចាប៉ីដងវែង លោកតា គង់ ណៃ នៅភូមិដូង ឃុំស្វាយទង ខាងជើង ស្រុកកំពង់ត្រាច ខេត្តកំពត។

ក្នុងឱកាសនោះដែរឯកឧត្តមវេជ្ជ. អ៊ុយ សំអាត បាននាំប្រសាសន៍ផ្តាំផ្ញើសួរសុខទុក្ខពី សំណាក់​សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ចំពោះព្រឹទ្ធាចារ្យ​ចាប៉ីដងវែង​លោកតា គង់ ណៃ និងសូមថែរក្សាសុខភាព ទៅពិនិត្យសុខភាពឱ្យបានទៀតទាត់ បើមានសភាពមិនស្រួល ត្រូវរួសរាន់បញ្ជូនព្រឹទ្ធាចារ្យទៅមន្ទីរពេទ្យភ្នំពេញឱ្យបានឆាប់បំផុត។

ជាមួយគ្នានេះ ព្រឹទ្ធាចារ្យចាប៉ីដងវែងលោកតា គង់ ណៃ និងក្រុមគ្រួសារ ​សូមថ្លែងអំណរគុណ សម្តេចកិត្តិព្រឹទ្ធបណ្ឌិត ប៊ុន រ៉ានីហ៊ុនសែន ដែលជានិច្ចកាលសម្ដេចតែងតែយកចិត្តទុកដាក់ ដល់​ក្រុមគ្រួសាររបស់ពួកគាត់ និងសូមជូនពរសម្ដេចឲ្យជួបតែសេចក្ដីសុខ ​និងពុទ្ធពរទាំង៤ប្រការគឺ អាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ។

សូមបញ្ជាក់ថា អំណោយផ្តល់ជូននាពេលនេះ រួមមាន៖ ទឹកត្រចៀកកាំមួយ​កន្ត្រក​ ស្ករស១គីឡូ ទឹកដោះគោឆៅ២យួរ និងថវិកា១០លានរៀល៕