អង់គ្លេស ៖ ក្រុមគ្រួសារ និងមិត្តភ័ក្តិ បានសម្ដែងក្ដីរំភើបរីករាយអមជាមួយនឹងទឹកភ្នែក នៅពេលដែលឪពុករបស់កីឡាករបាល់ទាត់ Luis Manuel Diaz របស់ក្រុមហង្សក្រហម Liverpool បានត្រឡប់ទៅដល់លំនៅឋានរបស់គាត់វិញ ក្នុងទីក្រុង Barrancas កាលពីថ្ងៃព្រហស្បតិ៍ (ទី៩ វិច្ឆិកា) បន្ទាប់ពីក្រុមទ័ពព្រៃ National Liberation Army (ELN) របស់ប្រទេសកូឡុំប៊ី បានដោះលែងរូបលោក។

រូបភាពវីដេអូកងពីទ័ពនៃប្រទេសកូឡុំប៊ីបានបង្ហាញថា លោក Diaz បានចេញពីរថយន្ត ដែលមិនចតឈប់ស្ងៀម ខណៈដែលរូបលោកបានមកជួបជុំជាមួយគ្រួសាររបស់ខ្លួនវិញ។ បុរសវ័យចំណាស់ លោក Luis Diaz ត្រូវបានចាប់ខ្លួន កាលពីថ្ងៃទី២៨ ខែតុលា នៅក្នុងក្រុង Barrancas ជាក្រុងជនបទ ដែលគាត់រស់នៅ ក្នុងខេត្ត La Guajira ភាគខាងជើង។

សូមបញ្ជាក់ថា ការចាប់ខ្លួនលោក Diaz បានរំខានដល់កិច្ចចរចាសន្តិភាពរបស់រដ្ឋាភិបាលជាមួយក្រុមទ័ពព្រៃ ELN ដែលបានចាប់ផ្តើមឡើងវិញ កាលពីឆ្នាំមុន ក្នុងក្តីសង្ឃឹមនៃការបញ្ចប់តួនាទីរបស់ក្រុមនេះ នៅក្នុងជម្លោះរយៈពេល ៦០ឆ្នាំរបស់ប្រទេសកូឡុំប៊ី ដែលបានសម្លាប់មនុស្សយ៉ាងហោចណាស់ ៤៥០.០០០នាក់៕