អាមេរិក ៖ វិទ្យាស្ថានស្រាវជ្រាវ នៅសហរដ្ឋអាមេរិក ឲ្យដឹងថា សីតុណ្ហភាពរបស់ពិភពលោក ក្នុងអំឡុងពេល ១២ខែរហូតដល់ខែតុលា គឺជាពេលវលា ដែលក្តៅបំផុតមិនធ្លាប់មាន។

វិទ្យាស្ថាន Climate Central បានវិភាគផលប៉ះពាល់លើសីតុណ្ហភាពពិភពលោក ដោយសារឧស្ម័នផ្ទះកញ្ចក់ ដែលបានមកពីការដុតធ្យូងថ្ម និងឧស្ម័នធម្មជាតិ ហើយនិងសកម្មភាពផ្សេងទៀតរបស់មនុស្ស។ ការវិភាគនេះ គឺផ្អែកលើទិន្នន័យសីតុណ្ហភាពជាមធ្យមប្រចាំថ្ងៃរបស់ប្រទេសចំនួន១៧៥ រួមជាមួយនឹងទិន្នន័យសីតុណ្ហភាពក្នុងទីក្រុងនានា។

ក្រុមអ្នកស្រាវជ្រាវបានឲ្យដឹងថា សីតុណ្ហភាពលើមធ្យម ទំនងជាកើនឡើងដល់ទៅ ៣ដង សម្រាប់អ្នករស់នៅក្នុងប្រទេសជាច្រើន ក្នុងនោះរួមមានប្រទេសជប៉ុន ឥណ្ឌូនេស៊ី អ៊ីតាលី និងប្រេស៊ីលផងដែរ។ ប្រជាជនពិភពលោកចំនួន ៧៣ភាគរយ ត្រូវបានជួបប្រទះនឹងសីតុណ្ហភាពលើមធ្យមយ៉ាងហោចណាស់ ៣០ថ្ងៃ។

វិទ្យាស្ថាននេះបានប្រាប់ថា សីតុណ្ហភាពសកល ក្នុងអំឡុងពេល ១២ខែ គឺ ១,៣អង្សាសេ លើសពីកម្រិតមុនឧស្សាហកម្ម។ ក្រុមស្រាវជ្រាវបាននិយាយថា បាតុភូត El Nino ដែលកំពុងធ្វើឲ្យមហាសមុទ្រឡើងកម្ដៅ មានឥទ្ធិពលតិចតួចទេ ក្នុងឆ្នាំនេះ តែកាបូនកខ្វក់បានធ្វើឲ្យផែនដីឡើងកម្ដៅកាន់តែខ្លាំង។

អ្នកវិភាគម្នាក់ ដែលបានចូលរួមក្នុងការវិភាគនេះ បានព្រមានថា មនុស្សរាប់ពាន់លាននាក់ នឹងត្រូវប្រឈមជាមួយកម្ដៅខុសប្រក្រតី នៅឆ្នាំក្រោយ ហើយបានបន្ថែមថា គ្មាននរណាម្នាក់មានសុវត្ថិភាពពីបម្រែបម្រួលអាកាសធាតុនោះទេ។ ជាមួយគ្នានេះ លោកបានសង្កត់ធ្ងន់ពីតម្រូវការសម្រាប់កិច្ចខិតខំប្រឹងប្រែងបន្ថែមទៀត ក្នុងការកាត់បន្ថយការបញ្ចេញកាបូន៕