អ្នកឃ្លាំមើលបណ្តាញអ៊ីនធឺណិត បាននិយាយថា ការចូលប្រើអ៊ីនធឺណិតនៅទូទាំងប្រទេសយេម៉ែនដែលហែកហួរដោយសង្រ្គាម មិនដំណើរការ នៅព្រឹកថ្ងៃសុក្រនេះ ដោយគ្មានការពន្យល់។

ការដាច់អ៊ីនធឺណិតនេះ បានចាប់ផ្តើម នៅព្រឹកថ្ងៃសុក្រ នៅប្រហែលម៉ោង០:០ ម៉ោងសកល ហើយបានឃើញការផ្អាកដំណើរការទាំងអស់នៅ ក្រុមហ៊ុន YemenNet ដែលជាក្រុមហ៊ុនផ្តល់សេវាដ៏ធំរបស់ប្រទេសនេះ ដល់អ្នកប្រើប្រាស់ ១០លាននាក់ ដែលឥឡូវនេះ ត្រូវបានគ្រប់គ្រងដោយក្រុមឧទ្ទាមហ៊ូធីដែលគាំទ្រដោយប្រទេសអ៊ីរ៉ង់។

ទាំងក្រុមហ៊ុនNetBlocks ដែលជាក្រុមតាមដានការដាច់អ៊ីនធឺណិត និងក្រុមហ៊ុនសេវាអ៊ីនធឺណិត CloudFlare បានរាយការណ៍ពីការដាច់នេះ។ ក្រុមហ៊ុនទាំងពីរ មិនបានបង្ហាញពីមូលហេតុនៃការដាច់អ៊ីនធឺណិតនេះទេ។

ក្រុមហ៊ុន CloudFlare បាននិយាយថា៖«ទិន្នន័យបង្ហាញថា បញ្ហានេះ បានប៉ះពាល់ដល់ការតភ្ជាប់នៅកម្រិតជាតិ ផងដែរ។

មន្ត្រីទូរគមនាគមន៍ហ៊ូធី និងយេម៉ែន មិនបានទទួលស្គាល់ភ្លាមៗចំពោះការដាច់អ៊ីនធឺណិតទេ។