ឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្ស បាននិយាយនៅថ្ងៃសុក្រថា អ៊ីស្រាអែល ត្រូវតែចាត់វិធានការជាបន្ទាន់ ដើម្បីការពារជនជាតិប៉ាឡេស្ទីន នៅតំបន់វេសប៊ងដែលគ្រប់គ្រងដោយអ៊ីស្រា  អែល ខណៈដែលពួកគេ រកឃើញថា ពួកគេជាគោលដៅដោយអំពើហិង្សាបន្ថែមទៀត ចាប់តាំងពីសង្គ្រាមអ៊ីស្រាអែល-ហាម៉ាស បានផ្ទុះឡើង កាលពីខែមុន។

លោក Volker Turk បាននិយាយថា យ៉ាងហោចណាស់មានជនជាតិប៉ាឡេស្ទីន ១៧៦នាក់ រួមទាំងកុមារចំនួន ៤៣នាក់ និងស្ត្រីម្នាក់ ត្រូវបានសម្លាប់ នៅក្នុងឧប្បត្តិហេតុពាក់ព័ន្ធនឹងកងកម្លាំងសន្តិសុខអ៊ីស្រាអែល ចាប់តាំងពីដើមខែតុលាមក។ យ៉ាងហោចណាស់ ជនជាតិប៉ាឡេស្ទីន ៨នាក់ ត្រូវបានសម្លាប់ ដោយអ្នកតាំងលំនៅអ៊ីស្រាអែល។

មុនពេលចាប់ផ្តើមសង្រ្គាមហ្កាហ្សារវាងអ៊ីស្រាអែល និងក្រុមឥស្លាមហាម៉ាស កាលពីថ្ងៃទី៧ ខែតុលា វាជាឆ្នាំដែលមានចំនួនមនុស្សស្លាប់ច្រើនបំផុតក្នុងកំណត់ត្រាសម្រាប់ប៉ាឡេស្ទីន នៅតំបន់វេសបែង ដោយមានមនុស្សប្រហែល ២០០នាក់ បានស្លាប់។

លោក Turk បានថ្លែងប្រាប់អ្នកយកព័ត៌មាននៅរដ្ឋធានី Amman របស់ប្រទេសហ្ស៊កដានីថា៖« ខ្ញុំ...សូមអំពាវនាវដល់អាជ្ញាធរអ៊ីស្រាអែល ឲ្យចាត់វិធានការជាបន្ទាន់ ដើម្បីធានាការការពារជនជាតិប៉ាឡេស្ទីន នៅតំបន់វេសបែង ដែលកំពុងត្រូវបានទទួលរងនូវអំពើហិង្សាជារៀងរាល់ថ្ងៃពីកងកម្លាំងអ៊ីស្រាអែល និងអ្នកតាំងលំនៅ។ ការធ្វើបាប ការចាប់ខ្លួន ការបណ្តេញចេញ ការបំភិតបំភ័យ និងភាពអាម៉ាស»។