អូស្ត្រាលី ៖ នៅថ្ងៃសុក្រនេះ នាយករដ្ឋមន្រ្តីអូស្រ្តាលី លោក Anthony Albanese បានចុះហត្ថលេខាលើកិច្ចព្រមព្រៀងទ្វេភាគីជាមួយប្រទេសកោះទូវ៉ាលូ ស្ថិតក្នុងមហាសមុទ្រប៉ាស៊ីហ្វិក ដែលមានគោលដៅការពារប្រទេសកោះតូចមួយនេះពីបញ្ហាបម្រែបម្រួលអាកាសធាតុ និងទប់ទល់ឥទ្ធិពលរបស់ចិននៅតំបន់ប៉ាស៊ីហ្វិក ។ 

កិច្ចព្រមព្រៀងដែលលោក Albanese បាននិយាយនៅលើបណ្តាញព័ត៌មានសង្គម X អតីតបណ្តាញព័ត៌មានសង្គម Twitter នឹងការពារអនាគតកោះទូវ៉ាលូ លើបញ្ហាបម្រែបម្រួលអាកាសធាតុ សន្តិសុខ និងការធ្វើអន្តោប្រវេសន៍ ។ 

អូស្ត្រាលី នឹងបង្កើតទិដ្ឋាការពិសេសប្រចាំឆ្នាំ សម្រាប់ពលរដ្ឋទូវ៉ាលូចំនួន ២៨០នាក់ ដែលស្មើនឹង ២,៥ភាគរយនៃចំនួនពលរដ្ឋសរុប ១១.២០០នាក់នៅលើកោះមួយនេះ ។ 

មូលនិធិនឹងត្រូវផ្តល់ផងដែរសម្រាប់ការចាក់បំពេញដីនៅកោះទូវ៉ាលូ ដើម្បីពង្រីករដ្ឋធានី Funafuti ឲ្យបានប្រហែល ៦ភាគរយ ។ 

ជាការឆ្លើយតបនឹងវត្តមានកើនឡើងរបស់ចិននៅក្នុងតំបន់ កិច្ចព្រមព្រៀងនេះ នឹងត្រូវការផងដែរឲ្យភាគីទាំង ២ពិគ្រោះយោបល់មុនពេលចុះហត្ថលេខាលើកិច្ចព្រមព្រៀងសន្តិសុខ ឬការពារជាតិជាមួយភាគីទី ៣ ។ 

សូមបញ្ជាក់ថា ប្រទេសកោះទូវ៉ាលូ ស្ថិតនៅក្នុងចំណោមប្រទេស ១៣ប៉ុណ្ណោះ ដែលនៅរក្សាទំនាក់ទំនងការទូតផ្លូវការជាមួយកោះតៃវ៉ាន់ ស្របពេលដេលទីក្រុងប៉េកាំង បង្កើនការវាទទីអំណាចរបស់ខ្លួននៅតំបន់ប៉ាស៊ីហ្វិក ៕