ចិន ៖ នៅថ្ងៃសុក្រនេះ ក្រសួងការបរទេសចិន បានអំពាវនាវឲ្យប្រទេសទាំងអស់ធ្វើការរួមគ្នា ក្រោយអូស្រ្តាលី ប្រកាសការធានាសន្តិសុខដល់ប្រទេសកោះទូវ៉ាលូ ស្ថិតក្នុងតំបន់ប៉ាស៊ីហ្វិក ដើម្បីឆ្លើយតបនឹងការឈ្លានពាន ការពារប្រទេសមួយនេះពីបញ្ហាបម្រែបម្រួលអាកាសធាតុ ហើយនិងពង្រឹងការធ្វើអន្តោប្រវេសន៍ នៅក្នុងកិច្ចព្រមព្រៀងមួយដែលមានគោលដៅទប់ទល់នឹងឥទ្ធិពលរបស់ចិននៅក្នុងតំបន់ប៉ាស៊ីហ្វិក ។ 

ក្រោមកិច្ចព្រមព្រៀងដែលត្រូវបានប្រកាសនៅថ្ងៃសុក្រនេះដោយនាយករដ្ឋមន្រ្តីអូស្រ្តាលីលោក Anthony Albanese និងសមភាគីទូវ៉ាលូរបស់គាត់គឺលោក Kausea Natano អូស្រ្តាលី នឹងត្រូវពិនិត្យមើលផងដែរការរៀបចំសន្តិសុខរបស់កោះទូវ៉ាលូជាមួយប្រទេសផ្សេងទៀត ។ 

ថ្លែងនៅក្នុងសន្និសីទសារព័ត៌មានក្នុងទីក្រុងប៉េកាំង អ្នកនាំពាក្យក្រសួងការបរទេសចិនលោក Wang Wenbin និយាយថា ចិនសង្ឃឹមថា ប្រទេសទាំងអស់នឹងធ្វើការរួមគ្នាដើម្បីពង្រឹងមិត្តភាព និងកិច្ចសហប្រតិបត្តិការជាមួយបណ្តាប្រទេសកោះនៅតំបន់ប៉ាស៊ីហ្វិក ។ 

ទោះបីជាអូស្រ្តាលី មាននូវកិច្ចព្រមព្រៀងការពារជាតិជាមួយបណ្តាប្រទេសកោះផ្សេងទៀតក្នុងតំបន់ប៉ាស៊ីហ្វិក នៅក្នុងតំបន់ដែលចិនទើបទទួលបានកិច្ចព្រមព្រៀងសន្តិសុខកាលពីពេលថ្មីៗជាមួយប្រទេសកោះសូឡូម៉ុន និងព្យាយាមពង្រីកទំនាក់ទំនងនយោបាយរបស់ខ្លួន ហើយនិងគម្រោងហេដ្ឋារចនាសម្ព័ន្ធក៏ដោយ ក៏កិច្ចព្រមព្រៀងរបស់កោះទូវ៉ាលូនេះ នឹងធ្វើឲ្យអូស្រ្តាលី កាន់តែក្លាយជាដៃគូសន្តិសុខដ៏ចម្បងរបស់ពួកគេ ៕