ភ្នំពេញ៖ ឯកឧត្តមឧបនាយករដ្ឋមន្រ្តី ប្រាក់ សុខុន រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ បានស្នើដោយសង្កត់ធ្ងន់ថា ប្រទេសមេគង្គ-ឡានឆាងត្រូវតែបន្តបង្ហាញសាមគ្គីភាពក្នុងការដោះស្រាយវិបត្តិសុខភាពពិភពលោក និងត្រូវផ្តោតអាទិភាពជាចម្បងក្នុងការធានានូវការទទួលបានគ្រប់គ្រាន់នូវវ៉ាក់សាំង និងថ្នាំពេទ្យ ដែលជាទំនិញសាធារណៈសកល។ 

នេះបើតាមសេចក្ដីប្រកាសព័ត៌មានរបស់ក្រ សួងការបរទេស និងសហប្រតិបត្តិការអន្តរជាតិ ចេញនៅយប់ថ្ងៃទី០៩ ខែមិថុនា ឆ្នាំ២០២១។

ប្រភពដដែលបន្តថា ឯកឧត្តមឧបនាយករដ្ឋមន្រ្តី ប្រាក់ សុខុន ក៏បានថ្លែងសរសើរចំពោះការប្តេជ្ញាចិត្ត និងតួនាទីជាអ្នកដឹកនាំរបស់ចិន ក្នុងការផ្តល់នូវឱសថ សម្ភារវេជ្ជសាស្ត្រ និងវ៉ាក់សាំងការពារជំងឺកូវីដ-១៩ ចំនួនរាប់លានដូស ជូនដល់បណ្តាប្រទេសមេគង្គបានទាន់ពេលវេលាផងដែរ។ 

ឯកឧត្តម ក៏បានគូសបញ្ជាក់ពីភាពចាំបាច់ក្នុងការពង្រឹងកិច្ចសហប្រតិបត្តិការលើវិស័យកសិកម្មបន្ថែមទៀត និងបានរម្លឹកឡើងវិញថា នាឱកាសកិច្ចប្រជុំកំពូលមេគង្គ-ឡានឆាងលើកទី៣ កាលពីឆ្នាំមុន សម្តេចតេជោ ហ៊ុន សែន នាយករដ្ឋមន្ត្រីកម្ពុជា បានថ្លែងគាំទ្រចំពោះសំណើរបស់ឯកឧត្តម លី ខឺឈាង នាយករដ្ឋមន្រ្តីចិន ក្នុងការជំរុញការនាំចូលបន្ថែមនូវផលិតផលកសិកម្ម និងបសុសត្វ ប្រកបដោយគុណភាព ពីបណ្តាប្រទេសមេគង្គ ដែលថ្មីៗនេះមានការនាំចេញនូវផ្លែស្វាយស្រស់ពីប្រទេសកម្ពុជាទៅកាន់ប្រទេសចិន បន្ថែមពីលើការដឹកជញ្ជូនផ្លែឈើ និងផលិតផលកសិកម្មដែលមានស្រាប់។ 

ឯកឧត្តម ក៏បានសម្តែងការគាំទ្ររបស់កម្ពុជាចំពោះការសិក្សារួមគ្នាស្តីពីការផ្លាស់ប្តូរទម្រង់នៃស្ថានភាពជលសាស្ត្ររបស់អាងទន្លេឡានឆាង-មេគង្គ និងយុទ្ធសាស្ត្រភាពធន់ ដែលកំពុងត្រូវបានសិក្សាដោយលេខាធិការដ្ឋានគណៈកម្មការទន្លេមេគង្គ និងមជ្ឈមណ្ឌលសហប្រតិបត្តិការធនធានទឹកឡានឆាង-មេគង្គ។ 

ឯកឧត្តម ក៏បានលើកឡើងអំពីសារៈសំខាន់ និងតួនាទីបំពេញបន្ថែមនៃកិច្ចសហប្រតិបត្តិការមេគង្គ-ឡានឆាង ជាមួយនឹងយន្តការអនុតំបន់ផ្សេងទៀត រួមមាន យុទ្ធសាស្រ្តនៃកិច្ចសហប្រតិបត្តិការសេដ្ឋកិច្ចអាយ៉េយ៉ាវ៉ាឌី-ចៅប្រាយ៉ា-មេគង្គ និងមហាអនុតំបន់មេគង្គ និងបានបញ្ជាក់ពីថាមភាព និងសក្តានុពលនៃកិច្ចសហប្រតិបត្តិការនេះ ក្នុងការជំរុញនូវការផ្លាស់ប្តូររចនាសម្ព័ន្ធក្នុងការកសាងភាពធន់ សំដៅលើកកម្ពស់គុណភាពកំណើន ក៏ដូចជាបង្កើនកិច្ចសហប្រតិបត្តិការសេដ្ឋកិច្ចតំបន់ក្នុងចំណោមរដ្ឋជាសមាជិកអាស៊ាន។

ប្រភពដដែល ក៏បានឱ្យដឹងដែរថា កិច្ចប្រជុំនេះបានបញ្ចប់ទៅជាមួយនឹងការអនុម័តលើ៖ (១)គំនិតផ្តួចផ្តើមស្តីពីកិច្ចសហប្រតិបត្តិការស៊ីជម្រៅក្នុងចំណោមរដ្ឋាភិបាលថ្នាក់មូលដ្ឋាននៃប្រទេសឡានឆាង-មេគង្គ, (២)សេចក្តីប្រកាសរួមស្តីពីការលើកកម្ពស់កិច្ចសហប្រតិបត្តិការអភិវឌ្ឍប្រកបដោយចីរភាពនៃប្រ ទេសឡានឆាង-មេគង្គ និង (៣)សេចក្តីប្រកាសរួមស្តីពីកិច្ចសហប្រតិបត្តិការស៊ីជម្រៅលើវិស័យឱសថបុរាណ ក្នុងក្របខណ្ឌកិច្ចសហប្រតិបត្តិការឡានឆាង-មេគង្គ៕ អត្ថបទ៖ គង់ ឌិន