ហុងគ្រី ៖ នាយករដ្ឋមន្ត្រីហុងគ្រីលោក Viktor Orban នៅថ្ងៃសុក្រ (ទី១០ ខែវិច្ឆិកា) នេះ បានប្រាប់វិទ្យុរដ្ឋថា សហភាពអឺរ៉ុប ឬ EU មិនត្រូវចាប់ផ្តើមកិច្ចពិភាក្សាសមាជិកភាពជាមួយអ៊ុយក្រែនទេ ដោយបានសង្កត់ធ្ងន់ថានេះ គឺជា «ជំហរយ៉ាងច្បាស់លាស់» របស់ប្រទេសហុងគ្រីលើបញ្ហានេះ។

គួរបញ្ជាក់ដែរថា បណ្ដាមេដឹកនាំប្រទេសសមាជិកសហភាពអឺរ៉ុប នឹងត្រូវសម្រេច នៅពាក់កណ្តាលខែធ្នូថា តើត្រូវទទួលយកអនុសាសន៍របស់គណៈកម្មការ ដើម្បីអញ្ជើញទីក្រុងគីវឲ្យចាប់ផ្តើមកិច្ចពិភាក្សាសមាជិកភាពភ្លាមៗ នៅពេលដែលប្រទេសនេះបំពេញតាមលក្ខខណ្ឌចុងក្រោយនានា។ ការសម្រេចបែបនេះតម្រូវឲ្យមានការឯកភាពគ្នាពីសមាជិកទាំង ២៧ប្រទេសរបស់ប្លុក ដោយប្រទេសហុងគ្រីត្រូវបានគេមើលឃើញថា ជាឧបសគ្គដ៏ធំ ក្នុងបញ្ហានេះ។

អ្នកជាតិនិយមលោក Orban ដែលចូលកាន់អំណាចតាំងពីឆ្នាំ២០១០ បាននិយាយថា ការខ្វែងគំនិតគ្នា រវាងប្លុក ដែលមានទីស្នាក់ការនៅទីក្រុងប៊្រុចសែល ប្រទេសបែលហ្ស៊ិក ជុំវិញមូលនិធិរបស់ EU រាប់ពាន់លានអឺរ៉ូ ដែលត្រូវបានផ្អាកផ្ដល់ឲ្យប្រទេសហុងគ្រី ដោយសារបញ្ហានីតិរដ្ឋនោះ មិនអាចភ្ជាប់ផ្លូវណាមួយ ដើម្បីឲ្យហុងគ្រីគាំទ្រកិច្ចពិភាក្សាចូលជាសមាជិកសហភាពអឺរ៉ុបរបស់អ៊ុយក្រែននោះទេ។

លោក Orban បាននិយាយថា៖ «កិច្ចពិភាក្សាសមាជិកភាព មិនត្រូវចាប់ផ្តើមនោះទេ នេះជាជំហរយ៉ាងច្បាស់លាស់របស់ហុងគ្រី»៕