អាមេរិក៖ ​ក្រុម​ពន្លត់​អគ្គិភ័យ​នៅ​ភាគ​ខាងជើង​ទីក្រុង Sacramento រដ្ឋ California និយាយ​ថា ​អាកាសធាតុ​ហួត​ហែង និង​ខ្យល់​ខ្លាំង​បណ្ដាល​ឲ្យ​កម្លាំង​ភ្លើង​ឆេះ​រាលដាល​ខ្លាំង​កាលពី​ថ្ងៃ​អង្គារ​។

ទីភ្នាក់ងារ​ពន្លត់​អគ្គិភ័យ​រដ្ឋ California បាន​រាយការណ៍​កាលពី​ល្ងាច​ថ្ងៃ​អង្គា​រថា ​ភ្លើង​ឆេះ​ព្រៃ នៅ​ក្នុង​តំបន់ Yuba ដែល​បាន​ចាប់ផ្ដើម​ឆេះ​រាលដាល​កាលពី​រសៀល​ថ្ងៃ​អង្គារ បាន​ឆេះ​បំផ្លាញ​ព្រៃឈើ​ជាង ​៣៨០​ហិច​តាស្មើនឹង ៣​,៨គីឡូម៉ែត្រ​ក្រឡា​ និង​ពន្លត់​បាន​ចំនួន ​២៥%​ ហើយ​។ ប្រធាន​ពន្លត់​អគ្គិភ័យរដ្ឋ California លោក Bob Counts បាន​និយាយ​ថា ថ្ងៃនេះ​ដោយសារតែ​ខ្យល់​ខ្លាំង​ពេក សន្សើម​តិច អាកាសធាតុ​ក្ដៅ ហើយ​ស្មៅ​ងាប់​ផង​នោះ​ធ្វើ​ឲ្យ​ភ្លើង​ឆេះ​កាន់​តែ​ខ្លាំង​។

លោក​បាន​ប្រាប់​ស្ថានីយ​ទូរទស្សន៍ KXTV ថា ភ្លើង​បាន​ឆេះ​រាល​ដាល​ទៅដល់​មូលដ្ឋាន​ទ័ពអាកាស​ប៊ី​ឡេ (Beale Air Force Base) និង​សំណង់​មួយ​ត្រូវ​បាន​ឆេះ​បំផ្លាញ​។​ លោក Counts ក៏បាន​និយាយ​ផង​ដែរ​ថា ពុំ​មាន​សេចក្ដីរាយការណ៍​ថា​ មាន​មនុស្ស ឬសត្វ​រង​របួស​ទេ ប៉ុន្តែ​លោក​បាន​បញ្ជាក់​ថា ​ប្រជាពលរដ្ឋ​ក្នុងស្រុក​មួយ​ចំនួន​ត្រូវ​បាន​ជម្លៀស​ចេញ​៕

អត្ថបទ៖ សុខមាន