មេដឹកនាំក្រុមហេសប៊ូឡាដ៏មានអំណាចបំផុតរបស់លីបង់លោក Sayyed Hassan Nasrallah បាននិយាយកាលពីថ្ងៃសៅរ៍ថា ក្រុមប្រដាប់អាវុធរបស់លោក បានប្រើប្រាស់អាវុធប្រភេទថ្មី និងវាយប្រហារលើគោលដៅថ្មីនៅអ៊ីស្រាអែល ក្នុងរយៈពេលប៉ុន្មានថ្ងៃចុងក្រោយនេះ ហើយលោកបានសន្យាថា ខ្សែត្រៀមមុខនៅតំបន់ភាគខាងត្បូងប្រឆាំងនឹងសត្រូវ នៅតែសកម្មដដែល ។

 វាគឺជាសុន្ទរកថាលើកទី ២របស់លោក Nasrallah ចាប់តាំងពីផ្ទុះសង្រ្គាមរវាងអ៊ីស្រាអែល និងក្រុមហាម៉ាស់កាលពីខែតុលា ។ នៅក្នុងសុន្ទរកថាលើកដំបូងរបស់លោកកាលពីដើមខែនេះ លោកនិយាយថា មាននូវលទ្ធភាពដែលការប្រយុទ្ធគ្នាលើសមរភូមិមុខលីបង់ ក្លាយជាសង្រ្គាមពេញលេញ ។

 លោក Nasrallah និយាយកាលពីថ្ងៃសៅរ៍ថា មាននូវការកើនឡើងប្រតិបត្តិការសឹករបស់ក្រុមហេសប៊ូឡា នៅតាមសមរភូមិមុខជាមួយអ៊ីស្រាអែល ហើយក្រុមប្រដាប់អាវុធរបស់លោក បានបើកការវាយប្រហារដោយយានដ្រូនជាលើកដំបូង ក៏ដូចជាប្រើប្រាស់មីស៊ីល Burkan ដែលមានផ្ទុកគ្រឿងផ្ទុះចន្លោះពី ៣០០ ទៅ ៥០០គ.ក ។

 លោកថា ក្រុមហេសប៊ូឡា បានវាយប្រហារលើគោលដៅនៅទីក្រុងភាគខាងជើង Kiryat Shmonaរបស់អ៊ីស្រាអែលជាលើកដំបូង ដើម្បីជាការសងសឹកនឹងការសម្លាប់ក្មេងស្រី ៣នាក់ ហើយនិងជីដូនរបស់ពួកគេកាលពីដើមខែនេះ ដោយលោកសន្យាថា សង្រ្គាមនៅតែបន្តនៅខ្សែត្រៀមមុខភាគខាងត្បូងលីបង់ ។

 សូមបញ្ជាក់ថា ក្រុមហេសប៊ូឡា បានផ្ទុះអាវុធជាមួយកងកម្លាំងអ៊ីស្រាអែល នៅតាមខ្សែត្រៀមមុខលីបង់-អ៊ីស្រាអែល ចាប់តាំងពីថ្ងៃទី ៨ ខែតុលារហូតមក ក្នុងនោះក្រុមអ្នកប្រយុទ្ធរបស់ពួកគេចំនួន ៧០នាក់ ត្រូវបានសម្លាប់ ហើយជនស៊ីវិលជាច្រើននាក់ទៀត ត្រូវបានសម្លាប់ផងដែរ ៕