ប្រព័ន្ធផ្សព្វផ្សាយរដ្ឋ KCNA របស់កូរ៉េខាងជើង បានរាយការណ៍ថា នៅថ្ងៃច័ន្ទ (១៣ វិច្ឆិកា) នេះ ប្រទេស​កូរ៉េខាងជើង បានអំពាវនាវឱ្យរំលាយទីបញ្ជាការអង្គការសហប្រជាជាតិ ដោយ​ហៅ​ទីភ្នាក់ងារ​នោះ​ថាជា «អង្គការសង្គ្រាមខុសច្បាប់» ជុំវិញកិច្ចប្រជុំ​ដែល​គ្រោង​នឹង​ធ្វើ​ឡើង​រវាង​រដ្ឋសមាជិក​ក្នុងប្រទេសកូរ៉េខាងត្បូង នៅសប្តាហ៍នេះ។

ទីបញ្ជា​កា​​រ​អង្គការសហប្រជាជាតិ (UNC) ដឹកនាំដោយសហរដ្ឋអាមេរិក គឺជាកង​កម្លាំង​យោធា​ចម្រុះ​ជាតិ​សាសន៍ និងត្រួតពិនិត្យកិច្ចការនៅក្នុងតំបន់គ្មានយោធាដែលមានកម្លាំងខ្លាំង (DMZ) រវាង​ប្រទេសកូរ៉េទាំងពីរ ដែលនៅតែមានលក្ខណៈបច្ចេកទេសក្នុងសង្គ្រាម។

ក្រសួង​ការពារជាតិរបស់ទីក្រុងសេអ៊ូល បាននិយាយកាលពីសប្តាហ៍មុនថា ប្រមុខ​ការពារ​ជាតិ​កូរ៉េ​ខាង​ត្បូង និងសហរដ្ឋអាមេរិក រួមជាមួយនឹងបណ្ដារដ្ឋសមាជិកនៃបញ្ជាការអង្គការសហប្រជាជាតិ នឹង​ជួបប្រជុំគ្នានៅថ្ងៃអង្គារ ស្អែកនេះ នៅទីក្រុងសេអ៊ូល ដើម្បីអំពាវនាវឱ្យទីក្រុងព្យុងយ៉ាង បញ្ឈប់​នូវ​អ្វីដែលខ្លួនបាននិយាយថាជា «សកម្មភាពខុសច្បាប់» និងអនុវត្ត​សេចក្ដី​សម្រេច​សន្តិសុខ​របស់អង្គការសហប្រជាជាតិ។

ការរិះគន់​របស់កូរ៉េខាងជើងនេះ កើតឡើងរយៈពេលមួយថ្ងៃបន្ទាប់ពីរដ្ឋមន្ត្រីការពារជាតិអាមេរិក លោក ឡយដ៎ អស្ទីន (Lloyd Austin) បានជួបសមភាគីកូរ៉េខាងត្បូងលោក ស៊ីន វ៉ុនស៊ីក (Shin Won-sik) នៅទីក្រុងសេអ៊ូល កាលពីថ្ងៃអាទិត្យ (១២ វិច្ឆិកា) ជាមួយរដ្ឋមន្ត្រី​ការពារ​ជាតិ​ជប៉ុន​ លោក មីណូរុ គីហារ៉ា (Minoru Kihara) សម្រាប់កិច្ចប្រជុំត្រីភាគី៕