ទីប្រឹក្សាទំនាក់ទំនងសម្រាប់ដែនដីប៉ាឡេស្ទីន របស់អង្គការក្រុមគ្រូពេទ្យគ្មានព្រំដែន MSF (Médecins Sans Frontières) លោកស្រី ជីណាន សាដ(Jinane Saad) បានបង្ហាញ​ការ​ព្រួយ​បារម្ភ​អំពីស្ថានភាពវេជ្ជសាស្ត្រ និងសុខភាពនៅតំបន់ហ្កាហ្សាកាលពីថ្ងៃអាទិត្យ ១២ វិច្ឆិកា ខណៈ​ការប្រយុទ្ធគ្នាបានកើតឡើងនៅជិតមន្ទីរពេទ្យធំៗ។         

ថ្លែង​ពី​ការិយាល័យរបស់លោកស្រីនៅទីក្រុងអាម៉ង់ (Amman) លោកស្រី សាដ (Saad) បានពិពណ៌នា​អំពីរបៀបដែលប្រព័ន្ធវេជ្ជសាស្ត្រ ជាពិសេសនៅក្នុងមន្ទីរពេទ្យ អាល់ ស៊ីហ្វា (al-Shifa) ក្នុងតំបន់ ហ្កាហ្សា ស្ថិតក្នុងដំណាក់កាលដួលរលំ ហើយត្រូវបានជំរុញដោយវេជ្ជបណ្ឌិត និ​ង​គ្រូពេទ្យម្នាក់ៗដែលមិន ព្រមចាកចេញពីអ្នកជំងឺ បើទោះបីជាខ្វះខាតថ្នាំពេទ្យ និង​ឧបករណ៍​វេជ្ជ​សាស្ត្រ​ក៏​ដោយ។

លោកស្រី Saad បាននិយាយថាក្រុមនៅក្នុងមន្ទីរពេទ្យ អាល់ ស៊ីហ្វា (al-Shifa) បាន​រាយការណ៍​ថា​អ្នក​ជំងឺ​បាន​ជាប់​នៅ​ក្នុង​មន្ទី​រ​ពេទ្យ​ដោយ​សារ​តែ​ការ​ប៉ះ​ទង្គិច​គ្នា​យ៉ាង​ខ្លាំង​នៅ​ក្នុង​តំបន់​ជុំវិ​ញ​នោះ ហើយការជម្លៀសមិនមែនជាជម្រើសសម្រាប់អ្នកជំងឺ និងទារកកើត​មុន​ខែ​កំណត់​ជា​ច្រើន​ដែល​ភ្ជាប់​នៅក្នុ​ងបន្ទប់សង្រ្គោះនោះទេ។

កងទ័ពអ៊ីស្រាអែលបាននិយាយថា ខ្លួនបានត្រៀមខ្លួន​រួច​ជា​ស្រេច​ក្នុង​ការ​ជម្លៀស​ទារ​ក​ចេញ​ពី​មន្ទីរ​ពេទ្យ​ដ៏​ធំបំផុតរបស់ហ្កាហ្សាកាលពីថ្ងៃអាទិត្យ ប៉ុន្តែមន្ត្រីប៉ាឡេស្ទីនបាននិយាយថា មនុស្ស​នៅ​ខាង​ក្នុង​នៅ​តែជាប់ ដោយទារកទើបនឹងកើតពីរនាក់បានស្លាប់ និងរាប់សិប​នាក់​ប្រឈម​ហានិភ័យ​ពី​ការ​ដាច់​ចរន្តអគ្គិសនី ស្របពេលមានការប្រយុទ្ធគ្នាយ៉ាងខ្លាំងនៅក្បែរនោះ៕