ប្រមុខអង្គការសុខភាពពិភពលោក (WHO) បាននិយាយកាលពីថ្ងៃអាទិត្យថា មន្ទីរពេទ្យធំជាង​គេបំផុត​នៅ​ក្នុងតំបន់ហ្កាហ្សា លែងដំណើរការទៀតហើយ អ្នកស្លាប់ក្នុង​ចំណោម​អ្នក​ជំងឺ​កំពុង​កើន​ឡើង ខណៈការវាយលុករបស់អ៊ីស្រាអែលកំពុងបន្តដាក់គោលដៅលើក្រុមហាម៉ាស។   

យោងតាមបុគ្គលិកពេទ្យ មន្ទីរពេទ្យនៅភាគខាងជើងត្រូវបានឡោមព័ទ្ធរបស់ប៉ាឡេស្ទីន រួម​ទាំង​មន្ទី​រ​ពេទ្យអាល់ ស៊ីហ្វា (al-Shifa )ត្រូវបានបិទដោយកងកម្លាំងអ៊ីស្រាអែល និង​ស្ទើរ​តែ​មិន​អាច​មើល​ថែ​ទាំអ្នកដែលនៅខាងក្នុងបាន ដោយទារកទើបនឹងកើត ៣នាក់បាន​ស្លាប់​នៅ​មន្ទីរ​ពេទ្យ​ស៊ីហ្វា និងជាច្រើនទៀតដែលប្រឈមហានិភ័យពីការដាច់ចរន្តអគ្គិសនី ស្រប​ពេល​មាន​ការ​ប្រយុទ្ធ​គ្នា​យ៉ាងខ្លាំងនៅក្បែរនោះ។    

អ៊ីស្រាអែលនិយាយថា ខ្លួនកំពុងវាយ​ប្រហារ​ដាក់​គោល​ដៅ​លើ​ក្រុម​សកម្ម​ប្រយុទ្ធ​ហាម៉ាស​ប៉ាឡេស្ទីន ដែលបានបើកការវាយប្រហារយ៉ាងសាហាវនៅភាគខាងត្បូងអ៊ីស្រាអែលកាលពីថ្ងៃទី ៧ ខែតុលា ហើយនិយាយថាក្រុមនេះមានមជ្ឈមណ្ឌលបញ្ជានៅក្រោមដី និង​នៅ​ជិត​មន្ទីរ​ពេទ្យ​នានា​។ 

ប្រមុខ​អង្គការសុខភាពពិភពលោក លោក ថេត្រូសអាត់ថាណមហ្គេប្រ៊ីយេស៊ូស ( Tedros Adhanom Ghebreyesus) បាននិយាយថាអង្គការសុខភាពពិភពលោក អាច​និយាយ​ទៅ​កាន់​អ្នក​ជំនាញ​សុខភាពនៅមន្ទីរពេទ្យស៊ីហ្វា ដែលបានពណ៌នាអំពីស្ថានភាព ធ្ងន់ធ្ងរ និងគ្រោះថ្នាក់ ដោយ​មានការបាញ់ស្រោច និងការទម្លាក់គ្រាប់បែក បន្ថែមលើស្ថានភាពធ្ងន់ធ្ងររួចទៅហើយ។ 

លោក Tedros បានចូលរួមជាមួយមន្ត្រីជាន់ខ្ពស់អង្គការសហប្រជាជាតិផ្សេងទៀត ដែល​អំពាវ​នាវ​ឱ្យ​មាន​បទ​ឈប់បាញ់ជាបន្ទាន់។

លោក និយាយថា ពិភពលោកមិនអាចនៅស្ងៀមទៀតទេ ខណៈមន្ទីរពេទ្យនានា ដែល​គួរ​តែ​ជា​ជម្រក​ប្រកប​ដោយសុវត្ថិភាព ត្រូវបានក្លាយជាកន្លែងមរណៈ ការបំផ្លិចបំផ្លាញ និង ភាព​ឣស់​សង្ឃឹម​៕