កងកម្លាំងអ៊ីស្រាអែល កាលពីយប់ថ្ងៃសៅរ៍ បានអះអាងថា ខ្លួន​បាន​សម្លាប់​មេ​បញ្ជាការ​ក្រុម​ហាម៉ាស​ម្នាក់​ដែលចាប់អ្នកហ្កាហ្សាចំនួន ១.០០០នាក់ជាចំណាប់ថ្នូរ នៅក្នុងមន្ទីរពេទ្យ ជា​ខែល​មនុស្ស​សម្រាប់ការពារខ្លួន។

កងកម្លាំងការពារអ៊ីស្រាអែល (IDF) បាននិយាយថា លោក អាម៉េដ សៀម (Ahmed Siam) ដែល​ជា​មេដឹកនាំនៅក្នុងកងពលតូច al-Furqan របស់ក្រុមហាម៉ាស បាន​រារាំង​ជន​ស៊ីវិល​មិន​ឲ្យ​ជម្លៀស​ចេញ​ពីមន្ទីរពេទ្យ Al-Rantisi នៅទីក្រុងហ្កាហ្សា កាលពីដើមសប្តាហ៍មុន។

ទាហាន​អ៊ីស្រាអែល បានជំរុញជនស៊ីវិលឲ្យភៀសខ្លួនទៅតំបន់ហ្កាហ្សាភាគខាងត្បូង ដើម្បី​បញ្ចៀស​ពួកគេពីការបាញ់ប្រហារ។

កងកម្លាំង​ការពារអ៊ីស្រាអែល (IDF) បាននិយាយថា លោក សៀម និងភេរវករ​ជា​ច្រើន​នាក់​ផ្សេង​ទៀត ត្រូវបានសម្លាប់ ខណៈពេលដែលកំពុងលាក់ខ្លួននៅអគារសិក្សាមួយក្នុងតំបន់ហ្កាហ្សា បន្ទាប់​ពី​ប្រតិបត្តិការរួមគ្នាជាមួយទីភ្នាក់ងារចារកម្ម Shin Bet របស់អ៊ីស្រាអែល។

កង​កម្លាំងការពារអ៊ីស្រាអែល បានបន្ថែមថា លោក អាម៉េដ សៀម បង្ហាញជាថ្មីម្តងទៀតថា៖ «ក្រុម​ហាម៉ាសប្រើប្រាស់ជនស៊ីវិលនៅតំបន់ហ្កាហ្សាស្រ្ទីប ជាខែល​ការពារ​មនុស្ស​សម្រាប់​គោល​បំណង​ភេរវកម្ម»៕