រដ្ឋមន្ត្រីការពារជាតិប្រទេសកូរ៉េខាងត្បូង និងសហរដ្ឋអាមេរិក បានជួបប្រជុំគ្នានៅថ្ងៃចន្ទ ទី១៣ ខែ​វិច្ឆិកា​នេះ សម្រាប់កិច្ចពិភាក្សាផ្នែកសន្តិសុខ ដោយកិច្ច​ពិភាក្សា​ត្រូវ​បាន​កំណត់​ផ្តោត​លើ​ការ​រួម​គ្នា​ប្រឆាំង​ការ​គំរាមកំហែងរបស់ប្រទេសកូរ៉េខាងជើង រួមទាំងការអនុវត្តយុទ្ធសាស្ត្រ «សន្ធិសញ្ញា​ឆ័ត្រ​ការពារ​» ។

យុទ្ធសាស្ត្រដែលប្រកាន់ខ្ជាប់នោះគឺថា សហរដ្ឋអាមេរិកនឹងប្រើប្រាស់យុទ្ធោបករណ៍ជាយុទ្ធសាស្ត្រ រួម​ទាំងកងកម្លាំងនុយក្លេអ៊ែរ ដើម្បីការពារសម្ព័ន្ធមិត្តរបស់ខ្លួន ដែលកាន់តែមានសារសំខាន់ ខណៈ​ប្រទេស​កូរ៉េខាងជើង បន្តឆ្ពោះទៅមុខជាមួយកម្មវិធីមីស៊ីលបាលីស្ទីក និងនុយក្លេអ៊ែរ​របស់​ខ្លួន​។

រដ្ឋមន្ត្រីការពារជាតិកូរ៉េខាងត្បូង លោក Shin Won-sik បានស្វាគមន៍សមភាគីរបស់លោក គឺ​លោក Lloyd Austin សម្រាប់កិច្ចប្រជុំប្រឹក្សាយោបល់សន្តិសុខប្រចាំឆ្នាំ (SCM) នៅ​កន្លែង​ដែល​រដ្ឋ​មន្ត្រី​ទាំងពី ត្រូវបានគេរំពឹងថានឹងពិនិត្យមើលផែនការសម្រាប់អនាគតសម្ព័ន្ធភាពផងដែរ។

សង្គ្រាម​អ៊ីស្រាអែល-ហាម៉ាស់ និងការឈ្លានពានរបស់រុស្ស៊ីនៅអ៊ុយក្រែន បានដាក់​ស្រមោល​លើ​ជំនួប​នេះ ក្នុងពេលទីក្រុងព្យុងយ៉ាងមានកិច្ចសហប្រតិបត្តិការយោធាកាន់តែខ្លាំងឡើងជាមួយទីក្រុងមូស្គូ និង​សំណួរអំពីការគាំទ្ររបស់ប្រទេសកូរ៉េខាងជើងចំពោះក្រុមសកម្មប្រយុទ្ធហាម៉ាស់៕