ហ្វូងមនុស្សដ៏ច្រើន បានមកប្រមូលផ្តុំគ្នាកាលពីថ្ងៃអាទិត្យ ក្នុងទីក្រុង San Francisco ដើម្បី​តវ៉ា​ចំ​​ពោះ​កិច្ចប្រជុំមេដឹកនាំនយោបាយឆ្លងកាត់សមុទ្រប៉ាស៊ីហ្វិក និងបញ្ហាជាច្រើនផ្សេងទៀត រួម​មាន​ទាំង​អ្នកអំពាវនាវឱ្យមានបទឈប់បាញ់ក្នុងសង្គ្រាមអ៊ីស្រាអែល និងក្រុមហាម៉ាស។

ក្រុម​អ្នកតវ៉ា បានប្រមូលផ្តុំគ្នានៅទីលានកណ្តាលក្រុង ខាងមុខអគារនាវាចម្លងរបស់ទីក្រុង San Francisco ជាច្រកចូលទៅកាន់ទីក្រុង ដោយមានកាន់បដា និង​ផ្ទាំង​រូបភាព​ប្រឆាំង​វេទិកា​កិច្ច​សហប្រតិបត្តិការសេដ្ឋកិច្ចអាស៊ី-ប៉ាស៊ីហ្វិក (APEC) អំពាវនាវឱ្យមានការផ្លាស់ប្តូរសេដ្ឋកិច្ច និង​បរិស្ថាន​ និងបានគ្រវីទង់ជាតិប៉ាឡេស្ទីន។

នគរបាលរំពឹងថា នឹងមានការតវ៉ាជាច្រើនទៀតនៅវេទិកា APEC ដែល​នៅ​តែ​បន្ត​ក្នុង​សប្តាហ៍​នេះ។​

នៅថ្ងៃពុធ ទី១៥ ខែវិច្ឆិកា ប្រធានាធិបតីសហរដ្ឋអាមេរិកលោក Joe Biden និងប្រធានាធិបតីចិន លោក Xi Jinping នឹងជួបគ្នានៅវេទិកា APEC ដែលជា​ជំនួប​លើក​ទីពីរ​រវាង​មេដឹកនាំ​ទាំង​ពីរ​ចាប់​តាំង​ពីលោក Biden ចូលកាន់តំណែងក្នុងខែមករា ឆ្នាំ ២០២១៕