ប្រធានាធិបតីសហរដ្ឋអាមេរិក លោក ចូ បៃដិន (Joe Biden) ចង់បង្កើតទំនាក់ទំនងយោធា និង​យោធា ឡើងវិញជាមួយប្រទេសចិន នេះបើយោងតាមទីប្រឹក្សាសន្តិសុខជាតិសេតវិមាន លោក ជែក ស៊ុលលីវ៉ាន (Jake Sullivan) បាននិយាយកាលពីថ្ងៃអាទិត្យ (១២ វិច្ឆិកា) ប៉ុន្មានថ្ងៃ​មុន​ពេល​ប្រធានាធិបតីអាមេរិក និងមេដឹកនាំចិន គ្រោងនឹងជួបប្រជុំគ្នា។

លោក បៃដិន នឹងជួបជាមួយប្រធានាធិបតីចិន លោក ស៊ី ជីនពីង (Xi Jinping) ដោយផ្ទាល់​ជា​លើក​ដំបូង​ក្នុងរយៈពេលមួយឆ្នាំ នៅថ្ងៃពុធ (១៥ វិច្ឆិកា) ខាងមុខនេះ ក្នុងអំឡុងពេល​កិច្ច​ប្រជុំ​កំពូល​កិច្ច​សហប្រតិបត្តិការសេដ្ឋកិច្ចអាស៊ីប៉ាស៊ីហ្វិក (APEC) នៅទីក្រុង សាន់ហ្រ្វាន់ស៊ីស្កូ របស់​សហរដ្ឋអាមេរិក ។

កិច្ចប្រជុំ​នោះនឹងក្លាយជាជំនួបផ្ទាល់លើកទី២ រវាងមេដឹកនាំទាំងពីរ ចាប់តាំងពីលោក បៃដិន ចូល​កាន់​តំណែងក្នុងខែមករា ឆ្នាំ២០២១ មក។

លោក ស៊ុលលីវ៉ាន បាននិយាយថា ទំនាក់ទំនងយោធាដែលបានស្តារឡើងវិញ អាច​កើត​ឡើង​នៅ​គ្រប់​កម្រិត​ចាប់​ពីថ្នាក់ដឹកនាំជាន់ខ្ពស់ រហូតដល់កម្រិតប្រតិបត្តិការយុទ្ធសាស្ត្រ ក៏ដូចជា «នៅ​លើ​ផ្លូវ​ទឹក និងនៅលើអាកាសនៅឥណ្ឌូប៉ាស៊ីហ្វិកជាដើម»។

មន្ត្រីជាន់​ខ្ពស់អាមេរិកមួយរូបបាននិយាយថា កិច្ចប្រជុំរវាងលោក បៃដិន និងលោក ស៊ី ត្រូវបាន​គេ​រំពឹង​ថា នឹងគ្របដណ្តប់លើបញ្ហាសកលរាប់ចាប់ពីសង្គ្រាមអ៊ីស្រាអែល-ក្រុមហាម៉ាស រហូត​ដល់​ការ​ឈ្លាន​ពានរបស់រុស្ស៊ី នៅក្នុងប្រទេសអ៊ុយក្រែន ទំនាក់ទំនងរបស់កូរ៉េខាងជើងជាមួយរុស្ស៊ី បញ្ហា​កោះ​តៃវ៉ាន់ ឥណ្ឌូប៉ាស៊ីហ្វិក សិទ្ធិមនុស្ស ការផលិតឳសថហ្វេតានីល (fentanyl) ប្រព័ន្ធ​បច្ចេក​វិទ្យាប្រាជ្ញាសិប្បនិម្មិត ក៏ដូចជាទំនាក់ទំនងសេដ្ឋកិច្ច និងពាណិជ្ជកម្ម ប្រកប​ដោយ​យុត្តិធម៌​ផង​ដែរ​៕