យោងតាមប្រព័ន្ធផ្សព្វផ្សាយបានឲ្យដឹងថា នគរបាលបាននិយាយថា សាលារៀនជ្វីហ្វនៅទីក្រុង ម៉ុងរ៉េអាល់ (Montreal) របស់ប្រទេសកាណាដា ត្រូវបានវាយប្រហារដោយគ្រាប់កាំភ្លើងកាលពីព្រឹកថ្ងៃអាទិត្យ (១២ វិច្ឆិកា) ដែលធ្វើឱ្យនោះជាឧបទ្ទវហេតុលើកទីបី ក្នុងរយៈពេលតិចជាងមួយសប្តាហ៍ ដែលសាលាជ្វីហ្វក្នុងទីក្រុងរបស់ប្រទេសកាណាដា ត្រូវបានវាយប្រហារ ស្របពេលមានភាពតានតឹងកាន់តែខ្លាំងឡើងជុំវិញជម្លោះរវាងអ៊ីស្រាអែល និងតំបន់ហ្កាហ្សា។

មិនមាននរណាម្នាក់រងរបួសនោះទេ ប៉ុន្តែផ្នែកខាងមុខរបស់សាលារៀន យ៉េស៊ីវ៉ា ហ្កេដូឡា (Yeshiva Gedola) នៃទីក្រុង ម៉ុងរ៉េអាល់ ត្រូវបានវាយប្រហារដោយគ្រាប់កាំភ្លើង។ សារព័ត៌មាន CBC នៅប្រទេសកាណាដា បានរាយការណ៍ថា ស្លាកស្នាមប៉ះទង្គិច និងសំបកគ្រាប់កាំភ្លើងត្រូវបានរកឃើញ បន្ទាប់ពីអ្នកស្រុកបានលឺសំឡើងបាញ់កាំភ្លើងកាលពីព្រឹកថ្ងៃអាទិត្យ។

ប្រព័ន្ធផ្សព្វផ្សាយក្នុងស្រុកបានរាយការណ៍ថា នៅសាលារៀនពីរផ្សេងទៀតក្នុងទីក្រុង ម៉ុងរ៉េអាល់ ក៏បានរាយការណ៍ថាបានរកឃើញរន្ធគ្រាប់កាំភ្លើងនៅខ្លោងទ្វារខាងមុខរបស់ពួកគេ កាលពីព្រឹកថ្ងៃព្រហស្បតិ៍ ផងដែរ។ គេមិនច្បាស់ទេថាតើឧបទ្ទវហេតុនៅសាលាជ្វីហ្វនៅភាគខាងលិចនៃទីក្រុងនេះ មានទំនាក់ទំនងគ្នាឬយ៉ាងណា។

នៅទីក្រុងតូរ៉ុនតូ របស់កាណាដា នគរបាលបានរាយការណ៍ថា ឧក្រិដ្ឋកម្មស្អប់ខ្ពើមប្រឆាំងនឹងជនជាតិជ្វីហ្វ និងមូស្លីម បានកើនឡើងទ្វេដងនៃចំនួនសរុបកាលពីឆ្នាំ២០២២ ក្នុងរយៈពេលបីសប្តាហ៍ បន្ទាប់ពីការវាយប្រហារលើកដំបូងរបស់ក្រុមសកម្មប្រយុទ្ធហាម៉ាស លើអ៊ីស្រាអែល កាលពីថ្ងៃទី ៧ ខែតុលា មក៕