អ៊ីស្រាអែល៖ ខណៈពេលដែលការជំនួសតំណែងបន្ទាប់ពីកាន់អំណាច ១២ឆ្នាំជិតចូលមកដល់ លោកនាយករដ្ឋមន្ត្រីអ៊ីស្រាអែល Benjamin Netanyahu សំឡឹងរកយុទ្ធនាការខ្លាំងស្រដៀងនឹងដំណើររបស់របស់លោក Trump ទាំងអស់ដើម្បីធ្វើឱ្យរដ្ឋាភិបាលដែលជិតចូលមកដល់ខុសច្បាប់ និងចោទប្រកាន់ក្រុមមេដឹកនាំបក្សទាំងនោះថា បានប្រព្រឹត្ត “ការលួចបន្លំនៃសតវត្សរ៍នេះ”។
ស្ថានការណ៍កាន់តែតានតឹង ស្របពេលដែលសមាជិកសភាអ៊ីស្រាអែល ប្រឈមនឹងការគំរាមកំហែង និងការធ្វើបាតុកម្មពីក្រុមអ្នកគាំទ្រលោកនាយករដ្ឋមន្ត្រីបច្ចុប្បន្ន Netanyahu ពោពេញដោយកំហឹងនៅខាងក្រៅគេហដ្ឋានរបស់ពួកគេ នាយកទីភ្នាក់ងារសន្តិសុខផ្ទៃក្នុងរបស់អ៊ីស្រាអែលបានចេញការព្រមាន ដ៏កម្រមួយអំពីអំពើហិង្សានយោបាយដែលអាចកើតមាន។ លោក Netanyahu បានបរាជ័យក្នុងការបង្កើតរដ្ឋាភិបាល បន្ទាប់ពីការបោះឆ្នោតជាប់គ្នាលើកទី៤ របស់អ៊ីស្រាអែលកាលពីខែមីនា បន្ទាប់មកលោក Naftali Bennett អតីតមនុស្សជំនិតរបស់លោក Netanyahu បានកាត់ផ្ដាច់កិច្ចព្រមព្រៀងចែករំលែកអំណាចជាមួយ “ប្លុកប្រឆាំងលោក Netanyahu ដើម្បីក្លាយជានាយករដ្ឋមន្ត្រីបន្ទាប់។
ដំបូងលោក Netanyahu បានបដិសេធមិនថ្កោលទោសការញុះញង់ប្រឆាំងនឹងលោក Bennett និងសម្ព័ន្ធមិត្តរបស់ខ្លួន ប៉ុន្តែកាលពីរសៀលថ្ងៃចន្ទ លោកបានថ្កោលទោសវោហារសាស្ត្រ ប្រកបដោយហិង្សានៅគ្រប់ភាគី និងបានអះអាងដោយគ្មានមូលដ្ឋានពិតប្រាកដថា ប្រព័ន្ធផ្សព្វផ្សាយបានបដិសេធមិននិយាយអំពីការញុះញង់ ស្រដៀងគ្នានឹងក្រុមគ្រួសាររបស់លោក។ សុន្ទរកថានេះបាននាំឲ្យមានការប្រៀបធៀប ទៅនឹងវីដេអូដែលលោក Donald Trump បានចេញផ្សាយក្នុងកំឡុងពេល នៃការបះបោរនៅវិមានកាពីតូលកាលពីថ្ងៃទី៦ ខែមករាដោយអំពាវនាវឱ្យក្រុមបាតុករ «ត្រឡប់ទៅផ្ទះវិញ» ខណៈពេលដែលបានសរសើរពួកគេ និងនិយាយឡើងវិញនូវការអះអាងគ្មានការពិតរបស់លោក ដែលថា លោកបានឈ្នះការបោះឆ្នោតដោយទទួលបានសំឡេងច្រើនលើសលុប៕
អត្ថបទ៖ សុខមាន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
