របាយការណ៍ជាច្រើនបានឲ្យដឹងថា ខណៈពេលដែលកងកម្លាំងការពារអ៊ីស្រាអែល បានវាយប្រហារមន្ទីរពេទ្យធំពីរនៅតំបន់ហ្កាហ្សា អ្នកជំងឺ និងបុគ្គលិក កំពុងប្រឈមមុខនឹងគ្រោះថ្នាក់នៃការស្លាប់ជាយថាហេតុ ដែលជំរុញឲ្យមានការអំពាវនាវបន្ថែមទៀតឲ្យមានបទឈប់បាញ់ក្នុងអំឡុងពេលសង្គ្រាមរបស់អ៊ីស្រាអែលលើប៉ាឡេស្ទីន រួមទាំងពីសហភាពអឺរ៉ុបផងដែរ។ 

មន្ទីរពេទ្យ Al-Shifa ដែលជាមន្ទីរពេទ្យដ៏ធំបំផុត នៅតំបន់ហ្កាហ្សាស្ទ្រីប គឺគ្មានអគ្គិសនីប្រើប្រាស់ និងខ្វះខាតធនធានសំខាន់ៗ ខណៈដែលកងកម្លាំងការពារអ៊ីស្រាអែល នៅតែបន្តទម្លាក់គ្រាប់បែកលើកន្លែងនេះ ដោយអះអាងថា ពួកគេកំពុងស្វែងរកក្រុមសកម្មប្រយុទ្ធហាម៉ាស។

សារព័ត៌មាន NBC News បានរាយការណ៍ ដោយ ដោយដកស្រង់សម្តីរបស់ក្រសួងសុខាភិបាលប៉ាឡេស្ទីនថា រហូតមកដល់ពេលនេះ យ៉ាងហោចណាស់ទារកបីនាក់ និងមនុស្ស ១០នាក់ផ្សេងទៀត នៅក្នុងមន្ទីរពេទ្យ បានស្លាប់ ចាប់តាំងពីការឡោមព័ទ្ធបានចាប់ផ្តើមនៅព្រឹកថ្ងៃសៅរ៍នេះ ទារកមិនគ្រប់ខែចំនួន ៣៦ នាក់ផ្សេងទៀត កំពុងស្ថិតក្នុងគ្រោះថ្នាក់នៃ«ការស្លាប់នៅពេលណាមួយ»។

សារព័ត៌មាន Al Jazeera បានរាយការណ៍ថា មន្ទីរពេទ្យ Al-Quds ដែលជាមន្ទីរពេទ្យធំទីពីរនៅតំបន់ហ្កាហ្សា ក៏ត្រូវបានឡោមព័ទ្ធ ហើយបាន «បញ្ឈប់ប្រតិបត្តិការ»។ 

សេចក្តីថ្លែងការណ៍របស់សហភាពអឺរ៉ុប បាននិយាយថា៖«អរិភាពទាំងនេះ កំពុងជះឥទ្ធិពលយ៉ាងធ្ងន់ធ្ងរដល់មន្ទីរពេទ្យ និងធ្វើឲ្យចំនួនអ្នកស្លាប់ដ៏គួរឲ្យរន្ធត់ដល់ជនស៊ីវិល និងបុគ្គលិកពេទ្យ» ដោយបន្ថែមថា កងកម្លាំងការពារអ៊ីស្រាអែល គួរតែ «អនុវត្តការអត់ធ្មត់ជាអតិបរមា» ដើម្បីជៀសវាងពីការសម្លាប់ជនស៊ីវិលបន្ថែមទៀត។