ក្រុមអាជ្ញាធរអន្តោប្រវេសន៍ម៉ិកស៊ិក បាននិយាយកាលពីថ្ងៃច័ន្ទ (១៣ វិច្ឆិកា) ថា ពួកគេបានឃាត់ខ្លួនជនអន្តោប្រវេសន៍ចំនួន ២៤៦នាក់ ពីជុំវិញចំណតរថយន្តក្រុងដ៏សំខាន់មួយនៅភាគខាងជើង នៃរដ្ឋធានី រួមទាំងកុមារជាង ៥០នាក់ ដែលត្រូវបានដាក់ឱ្យស្ថិតនៅក្រោមការមើលថែនៃសេវាសង្គម។
ប្រទេសម៉ិកស៊ិក បានមើលឃើញកំណើនមនុស្សដែលកំពុងព្យាយាមឆ្លងកាត់ប្រទេសតាមផ្លូវនានាទៅកាន់ព្រំដែនសហរដ្ឋអាមេរិក ជាមួយនឹងចំនួនជនអន្តោប្រវេសន៍ដ៏ច្រើនលើសលប់ដែលត្រូវបានចាប់ខ្លួនដោយក្រុមអាជ្ញាធរសហរដ្ឋអាមេរិកកាលពីឆ្នាំមុន ខណៈមនុស្សជាច្រើនបានភៀសខ្លួនចេញពីស្ថានភាពសេដ្ឋកិច្ចដែលអស់សង្ឃឹម ឬអំពើហិង្សានៅក្នុងប្រទេសរបស់ពួកគេ។
យោងតាមទីភ្នាក់ងារអន្តោប្រវេសន៍ម៉ិកស៊ិក INM បានឲ្យដឹងថា ជនអន្តោប្រវេសន៍ដែលត្រូវបានចាប់ខ្លួននោះមកពីអាមេរិកកណ្តាល វ៉េណេស៊ុយអេឡា និងហៃទីជាដើម អំឡុងពេលត្រួតពិនិត្យអន្តោប្រវេសន៍ចាប់ពីថ្ងៃសុក្រ ដល់ថ្ងៃអាទិត្យ តាមសំណើរបស់ក្រុមអាជ្ញាធរមូលដ្ឋាន។
ខណៈពេលដែលមនុស្សពេញវ័យត្រូវបានផ្ទេរទៅការិយាល័យអន្តោប្រវេសន៍ ជនអន្តោប្រវេសន៍ជាគ្រួសារត្រូវបានដាក់ឱ្យស្ថិតនៅក្រោមការមើលថែរបស់ទីភ្នាក់ងារកុមារ និងសេវាសុខុមាលភាពគ្រួសារ។
ចំនួនជនអន្តោប្រវេសន៍ដ៏ច្រើនលើសលប់ ក៏បានធ្វើដំណើរឆ្លងកាត់ព្រៃ ដារៀន ដ៏គ្រោះថ្នាក់ដែលខណ្ឌប្រទេសប៉ាណាម៉ា ពីទ្វីបអាមេរិកខាងត្បូង ក្នុងឆ្នាំនេះ ដោយភាគច្រើនធ្វើដំណើរទៅកាន់សហរដ្ឋអាមេរិក ដើម្បីស្វែងរកឱកាសសម្រាប់ជីវិតល្អប្រសើរជាងនេះ៕
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
