សៀមរាប៖ ក្រុមការងារអន្ដរក្រសួង និងមន្ទីរអភិវឌ្ឍន៍ជនបទ ដឹកនាំដោយឯកឧត្តម នួន ដាញិល រដ្ឋលេខាធិការក្រសួងអភិវឌ្ឍន៍ជនបទ បានចុះត្រួតពិនិត្យ និងវាយតម្លៃលទ្ធផលគុណភាពផ្លូវ បន្ទាប់ពីជួសជុលរួចរាល់មួយរយភាគរយដែលខូចខាតដោយសារទឹកជំនន់ និងរថយន្ដដឹកជញ្ជូនលើសទម្ងន់ នៅស្រុកសូទ្រនិគម និងស្រុកជីក្រែង ខេត្ដសៀមរាប នាថ្ងៃទី១៣ខែវិច្ឆិកាឆ្នាំ២០២៣នេះ។

លោក ទូច ម៉ាឡា ប្រធានមន្ទីរអភិវឌ្ឍន៍ជនបទ ខេត្ដសៀមរាប មានប្រសាសន៍ថា ផ្លូវមួយខ្សែនេះ មានប្រវែងជាង១២គីឡូវម៉ែត្រ នៅចំណុចឃុំតាយ៉ែក និងឃុំពង្រលើ ទំហំទទឹងខ្នងលើ៦ម៉ែត្រ ប្រភពថវិការាជរដ្ឋាភិបាលជួលជុល ក្រោមគម្រោងថែទាំខួបក្រាលគ្រួសក្រហម ដោយមន្ទីរអភិវឌ្ឍន៍ជនបទ។លោកបានបន្ដថា ផ្លូវនេះបានជួសជុលឡើងវិញរយៈពេលបីខែ ដោយចាប់ពីខែកក្កដា ដល់ខែតុលាឆ្នាំ២០២៣នេះ ដែលមកដល់ពេលនេះ ជួសជុលរួរាល់១០០ភាគរយហើយ។

លោកបន្ថែមថា ផ្លូវគ្រួសក្រហមមួយខ្សែនេះ បានសាងសង់ដោយក្រសួងអភិវឌ្ឍន៍ជនបទ ចាប់តាំងឆ្នាំ២០១៩មក ប៉ុន្ដែត្រូវបានខូចខាតយ៉ាងធ្ងន់ធ្ងរ ពិធបាកធ្វើដំណើរ ដោយមានគ្រហ៊ុកធំៗ ដោយសារទឹកជំនន់ផង និងដោយសាររថយន្ដដឹកជញ្ជូនលើសទម្ងន់ផង ទើបធ្វើឱ្យពិបាកធ្វើដំណើរ ខណៈដែលនៅតំបន់នោះសំបូរដោយដំណាំកសិកម្មដូចដំឡូង ស្វាយចន្ទីជាដើម។

លោកបន្ដថា ក្រុមគណៈកម្មការនៃក្រសួងអភិវឌ្ឍន៍ជនបទ បានទទួលស្គាល់ពីគុណភាពមួយរយភាគរយ បន្ទាប់ពីបានវាយតម្លៃលទ្ធផលរួចរាល់ ព្រោះផ្លូវមួយខ្សែនេះ មានសារៈសំខាន់ សំរាប់បំរើ ផលប្រយោជន៍ ប្រជាពលរដ្ឋ ក្នុងការធ្វើដំណើរ ទៅកាន់ទីផ្សារ មន្ទីរពេទ្យ វត្តអារាម សាលារៀន និងសេវាសាធារណៈផ្សេងៗ។

បើតាមរបាយការណ៍របស់មន្ទីរអភិវឌ្ឍន៍ជនបទ ខេត្ដសៀមរាប បានបង្ហាញថា ហេដ្ឋានរចនាសម្ព័ន្ធផ្លូវជនបទ ដែលបានទទួលរងយសារជំនន់ទឹកភ្លៀងនៅអំឡុងខែតុលា ឆ្នាំ២០២៣នេះ មានចំនួនជាង៦៨ខ្សែ ក្នុងនោះ មានផ្លូវលិចទឹក ទឹកហូរដាច់តួផ្លូវ ទឹកច្រោះជើងទេរជាដើម៕

ដោយ ៖ ឈិត សាវី