គណៈកម្មាធិការរៀបចំការបោះឆ្នោតរបស់កោះតៃវ៉ាន់ នៅថ្ងៃអង្គារ (ទី១៤ ខែវិច្ឆិកា) នេះ បានឲ្យដឹងថា លោក Terry Gou ដែលជាស្ថាបនិកក្រុមហ៊ុន Foxconn ដែលជាអ្នកផ្គត់ផ្គង់ដ៏ធំរបស់ក្រុមហ៊ុន Apple នោះ ប្រមូលបានហត្ថលេខាគ្រប់គ្រាន់ ដែលអាចឲ្យរូបលោកមានសិទ្ធិឈរឈ្មោះជាបេក្ខជនឯករាជ្យ ដើម្បីប្រជែងតំណែងមេដឹកនាំរបស់កោះនេះ។

គណៈកម្មាធិការរៀបចំការបោះឆ្នោត បានប្រាប់ថា លោក Gou ប្រមូលបានហត្ថលេខាច្រើនជាង ៩០០.០០០ហត្ថលេខា ក្នុងចំណោម ៣០០.០០០ហត្ថលេខា ដែលត្រូវការ ដើម្បីទទួលបានសិទ្ធិឈរឈ្មោះ។

មហាសេដ្ឋីរូបនេះ បានប្រកាសពីការប៉ុនប៉ងរបស់លោក ក្នុងការចូលរួមការប្រកួតប្រជែងនេះ កាលពីខែសីហា ដោយនិយាយថា លោកចង់បង្រួបបង្រួមក្រុមប្រឆាំង និងធានាថា កោះនេះមិនក្លាយជា «អ៊ុយក្រែនបន្ទាប់» នោះទេ ដោយលោកបានបន្ទោសគណបក្សប្រជាធិបតេយ្យជឿនលឿន (DPP) ដែលកំពុងកាន់អំណាចថា បានធ្វើឲ្យកោះតៃវ៉ាន់ទៅកាន់មាត់ជ្រោះនៃសង្រ្គាម ដោយការប្រឆាំងប្រទេសចិន ដែលអះអាងថា កោះនេះជាចំណែកនៃទឹកដីរបស់ខ្លួន។

លោក Gou គឺជាមនុស្សទី៤ ដែលបានបង្ហាញពីឆន្ទៈក្នុងការចូលរួមក្នុងសង្វៀនប្រកួតប្រជែងនេះ ប៉ុន្តែតួលេខនៃការស្ទង់មតិ បានបង្ហាញថា លោកស្ថិតនៅលំដាប់ក្រោម ហើយតាមពីក្រោយយ៉ាងឆ្ងាយពីបេក្ខជននាំមុខគេ គឺលោក William Lai ដែលបច្ចុប្បន្នជាមេដឹកនាំលំដាប់ទី២របស់កោះនេះ៕