ម៉ាឡេស៊ី ៖ ទីភ្នាក់ងារសារព័ត៌មានរដ្ឋ Bernama របស់ប្រទេសម៉ាឡេស៊ី បានរាយការណ៍ថា តុលាការកំពូលរបស់ប្រទេសនេះ នៅថ្ងៃអង្គារ (ទី១៤ ខែវិច្ឆិកា) បានសម្រេចកែប្រែទោសប្រហារជីវិត និងការដាក់ពន្ធនាគារក្នុងរយៈពេលនៃជីវិតធម្មជាតិរបស់មនុស្ស ១១នាក់ ដែលត្រូវបានផ្ដន្ទាទោសពីបទជួញដូរគ្រឿងញៀន ដោយក្នុងនោះរួមទាំងជនជាតិថៃ ២នាក់ផងដែរ ដោយការកេប្រែនេះ កើតឡើងបន្ទាប់ពីកំណែទម្រង់ទោសប្រហារជីវិត ទទួលបានការអនុម័ត កាលពីដើមឆ្នាំនេះ។

សារព័ត៌មាន Bernama បានរាយការណ៍ថា អ្នកទោសទាំង ១១រូបនោះ រួមទាំងអ្នកទោសត្រូវប្រហារជីវិតចំនួន ៧នាក់ផងដែរ ត្រូវបានបន្ធូរបន្ថយទោសពីការជាប់ពន្ធនាគារអស់មួយជីវិតមកត្រឹម ៣០ឆ្នាំម្នាក់ៗ នៅក្នុងដំបូងសំណុំរឿងដំបូងដែលត្រូវបានពិនិត្យឡើងវិញ ដោយតុលាការសហព័ន្ធ បន្ទាប់ពីការធ្វើនូវកំណែទម្រង់នេះ។

សូមបញ្ជាក់ថា សមាជិកសភាម៉ាឡេស៊ីកាលពីខែមេសា បានបោះឆ្នោតលុបចោលទោសប្រហារជីវិតជាកាតព្វកិច្ច សម្រាប់ទោសឧក្រិដ្ឋ ដោយក្នុងរួមទាំងអំពើជួញដូរគ្រឿងញៀន និងឃាតកម្មផងដែរ ដោយអនុញ្ញាតឲ្យចៅក្រមប្រើឆន្ទានុសិទ្ធិរបស់ពួកគេជុំវិញថា តើត្រូវដាក់ទោសទណ្ឌកម្រិតណា។

វិសោធនកម្មនេះ ក៏បានមើលឃើញផងដែរពីការដាក់ទោស ដែលអំពាវនាវឲ្យមានការដាក់ទោសជាប់ពន្ធនាគារ ក្នុងរយៈពេលនៃជីវិតធម្មជាតិរបស់ជនល្មើស ដែលជំនួសដោយការជាប់ពន្ធនាគារពី ៣០ឆ្នាំ ទៅ ៤០ឆ្នាំ។ រដ្ឋមន្ត្រីផ្នែកច្បាប់របស់ប្រទេសម៉ាឡេស៊ី លោកស្រី Azalina Othman Said បានប្រាប់ថា មនុស្សជិត ១.០០០នាក់ ដែលកំពុងប្រឈមនឹងការកាត់ទោសប្រហារជីវិត ឬជាប់ទោសក្នុងរយៈពេលនៃជីវិតធម្មជាតិនោះ បានដាក់ពាក្យស្នើសុំឲ្យមានការកាត់ទោសឡើងវិញ ដោយបន្ថែមថា ដំណើរការនេះ បានឆ្លុះបញ្ចាំងពីការប្តេជ្ញាចិត្តរបស់រដ្ឋាភិបាល ក្នុងការលើកកម្ពស់សិទ្ធិមនុស្ស៕