អាមេរិក៖ លោក​ប្រធានាធិបតី​អាមេរិក Joe Biden បាន​ចាប់ផ្ដើម​ដំណើរ​ទៅកាន់​បរទេស​ជា​ផ្លូវការ​លើកដំបូង ​ដោយ​ព្រមាន​រុស្ស៊ី​ថា ប្រទេស​នេះ​នឹង​ជួប​បញ្ហា​ធ្ងន់ធ្ងរ​ និង​ជូរ​ចត់​បំផុត ប្រសិន​បើ​ខ្លួន​ធ្វើ​សកម្មភាព​ដ៏​គ្រោះថ្នាក់​ណាមួយ​។

លោក Biden បាន​បញ្ជាក់​ច្បាស់​ពី​ចេតនា​របស់​លោក ​ក្នុង​ការ​រឹតចំណង​ទាក់ទង​ជាមួយ​ប្រទេស​ជា​សម្ព័ន្ធមិត្ត​របស់​សហរដ្ឋអាមេរិក ក្រោយ​ទំនាក់ទំនង​ប្រេះស្រាំ​ក្រោម​រដ្ឋបាល​លោក Trump​។ គួរ​ឲ្យ​ដឹង​ថា លោក​ប្រធានាធិបតី​ Joe Biden​ បាន​ទៅដល់​ចក្រភព​អង់គ្លេស​កាលពី​ថ្ងៃ​ពុធ​។​ នៅ​ថ្ងៃ​បញ្ចប់​ដំណើរ​ការងារ​របស់​លោក លោក Biden គ្រោង​នឹង​ជួប​ជាមួយ​លោក​ប្រធានាធិបតី Vladimir Putin នៅ​ក្នុង​ទីក្រុង​ហ្សឺ​ណែវ​។​

ទំនាក់ទំនង​រវាង​ទីក្រុង Washington និង​ទីក្រុង Moscow ធ្លាក់​ចុះ​ទាប​បំផុត​ជុំវិញ​បញ្ហា​ចម្រូង​ចម្រាស​ផ្សេងៗ​ជាច្រើន។ កាលពី​ខែ​មេសា លោក​ប្រធានាធិបតី Putin បាន​ចោទប្រកាន់​ប្រទេស​មហា​អំណាច​លោក​ខាង​លិច ​ពី​បទ​ព្យាយាម​វាយប្រហារ​លើ​រុស្ស៊ី​ និង​បាន​ព្រមាន​ប្រទេស​ទាំងនោះ​កុំ​ឲ្យ​ឆ្លង​ដែន​បន្ទាត់​ក្រហម​៕

អត្ថបទ៖ សុខមាន