ហុងគ្រី ៖ រដ្ឋមន្ត្រីការបរទេសហុងគ្រី នៅថ្ងៃអង្គារ (ទី១៤ ខែវិច្ឆិកា) នេះ បាននិយាយថា ម៉ាស៊ីនរ៉េអាក់ទ័រចំនួន២ ដែលកំពុងត្រូវបានដំឡើងដោយក្រុមហ៊ុន Rosatom របស់រុស្ស៊ី នៅរោងចក្រនុយក្លេអ៊ែរ Paks របស់ប្រទេសហុងគ្រី គួរតែត្រូវបានរៀបចំរួចរាល់ ដើម្បីភ្ជាប់ទៅបណ្តាញអគ្គិសនីរបស់ប្រទេស នៅដើមទសវត្សរ៍ក្រោយ។

លោក Peter Szijjarto បានប្រាប់ថា រដ្ឋាភិបាល និងក្រុមហ៊ុន Rosatom បានចុះហត្ថលេខាលើផែនការសម្រាប់កាលវិភាគសាងសង់ ដើម្បីដំឡើងម៉ាស៊ីនរ៉េអាក់ទ័រ ដែលលោកបាននិយាយថា នឹងអាចកាត់បន្ថយការបញ្ចេញកាបូនឌីអុកស៊ីតរបស់ប្រទេសហុងគ្រីរាប់លានតោន។

សូមបញ្ជាក់ថា ថាមពលនុយក្លេអ៊ែរមិនត្រូវបានដាក់ទណ្ឌកម្មដោយសហភាពអឺរ៉ុបប្រឆាំងនឹងរុស្ស៊ី ជុំវិញសង្រ្គាមនៅអ៊ុយក្រែននោះទេ។ ហើយប្រទេសហុងគ្រី ដែលទិញថាមពលភាគច្រើនពីរុស្ស៊ី បាននិយាយថា ខ្លួននឹងរារាំងរាល់ការដាក់ទណ្ឌកម្មនានា ដែលបង្កផលប៉ះពាល់ដល់ការសាងសង់នេះ៕