ឥណ្ឌា ៖ ក្រុមមន្ត្រីឥណ្ឌាបាននិយាយថា ក្រុមសង្គ្រោះនៅថ្ងៃពុធ (១៥ វិច្ឆិកា) នេះ មិនអាចចូលទៅដល់កម្មករ ៤០នាក់ ដែលជាប់នៅក្នុងផ្លូវរូងក្រោមដីនៃគម្រោងផ្លូវហាយវេមួយក្នុងប្រទេសឥណ្ឌា បានទេ ដោយសារតែផ្ទាំងថ្មដ៏ធំជាច្រើនកំពុងរារាំងកិច្ចខិតខំប្រឹងប្រែងដើម្បីបង្កើតផ្លូវជម្លៀសចេញ។

គិតមកដល់ថ្ងៃពុធនេះ គឺមានរយៈពេលបីថ្ងៃហើយចាប់តាំងពីរូងក្រោមដីនោះបានដួលរលំ ប៉ុន្តែកម្មករដែលជាប់ក្នុងនោះនៅតែមានសុវត្ថិភាព និងមានសុខភាពល្អ នេះបើយោងមន្ត្រីម្នាក់ដែលចូលរួមក្នុងប្រតិបត្តិការជួយសង្គ្រោះបានប្រាប់សារព័ត៌មាន រ៉យទ័រ។ 

ក្រុមកម្មករ ដែលជាប់ក្នុងរូងក្រោមផ្លូវហាយវេនោះ ត្រូវបានផ្តល់អាហារ ទឹក និងអុកស៊ីហ្សែនតាមបំពង់តាំងពីព្រឹកថ្ងៃអាទិត្យ បន្ទាប់ពីរូងក្រោមដីបានបាក់នៅម៉ោង ៥:៣០នាទីព្រឹក (ម៉ោងក្នុងស្រុក) ថ្ងៃដដែលនោះ។

តំបន់ភ្នំនៅប្រទេសឥណ្ឌា គឺងាយនឹងមានបំណាក់ដី ការរញ្ជួយដី និងទឹកជំនន់ណាស់ ហើយឧបទ្ទវហេតុនេះកើតឡើងបន្ទាប់ពីព្រឹត្តិការណ៍នៃបំណាក់ដីដែលក្រុមអ្នកជំនាញភូមិសាស្ត្រ អ្នកស្រុក និងមន្ត្រីបានស្តីបន្ទោសលើការសាងសង់យ៉ាងឆាប់រហ័សពេកនៅលើភ្នំ។ 

គម្រោងផ្លូវហាយវេនោះ ប្រឈមនឹងការរិះគន់ពីក្រុមអ្នកជំនាញបរិស្ថានជាច្រើន ហើយការងារមួយចំនួនធ្លាប់ត្រូវបានផ្អាក បន្ទាប់ពីលំនៅឋានរាប់រយខ្នងត្រូវបានខូចខាតដោយសារការបាក់ស្រុតនៅតាមដងផ្លូវក្បែរនោះ៕