ភ្នំពេញ៖ ក្រុមបុគ្គលស្វ័យនិយោជន៍ នៅថ្ងៃទី១៥ ខែវិច្ឆិកានេះ​ បន្តនាំគ្នាទៅធ្វើបណ្ណ ប.ស.ស បន្ទាប់ពីរាជរដ្ឋាភិបាលប្រកាសបើកកម្មវិធីជាតិរបបសន្តិសុខសង្គមផ្នែកថែទាំសុខភាព តាមរបបភាគទានដោយស្ម័គ្រចិត្ត ​សម្រាប់បុគ្គលស្វ័យនិយោជន៍ ​និងអ្នកក្នុងបន្ទុកសមាជិក ប.ស.ស។

ក្នុងពេលមកធ្វើបណ្ណសមាជិក ប.ស.ស ស្ថិតនៅខណ្ឌច្បារអំពៅ ​រាជធានីភ្នំពេញ ក្រុមបុគ្គល​ស្វ័យ​និយោជន៍ បានប្រាប់ BTV ឱ្យដឹងថា​ ពេលមានបណ្ណនេះ ​ពួកគេទទួលបានអត្ថប្រយោជន៍ច្រើន ជាពិសេសកាត់បន្ថយការចំណាយបានមួយកម្រិតពេលសម្រាកព្យាបាលនៅមន្ទីរពេទ្យរដ្ឋ និងពេទ្យឯកជនដែលជាដៃគូរសហការណ៍ជាមួយ ប.ស.ស។ ពួកបង្ហាញភាពរីករាយ និងពេញចិត្តកម្មវិធីជាតិរបបសន្តិសុខសង្គមផ្នែកថែទាំសុខភាពនេះ។

សូមជម្រាបថា ការពង្រីកវិសាលភាពនេះ ​ដើម្បីឆ្លើយតបនឹងកំណើននៃតម្រូវការ ​និងសេចក្តីប្រាថ្នា ការ​ចង់ក្លាយជាសមាជិក ប.ស.ស ​ពីបងប្អូននៃវិស័យសេដ្ឋកិច្ចក្រៅប្រព័ន្ធ ជាពិសេសបុគ្គលស្វ័យ​និយោជន៍ ព្រមទាំងពីសំណាក់សមាជិក ប.ស.ស ដែលប្រាថ្នាចង់បានការថែទាំ​ដល់សមាជិកគ្រួសារខ្លួនផងដែរ។

គិតត្រឹមខែតុលា ឆ្នាំ២០២៣នេះ ប.ស.ស មានសមាជិកសកម្មសរុបប្រមាណ២លាននាក់ ដែល​បានទៅពិនិត្យព្យាបាលជំងឺដោយមិនបង់ប្រាក់ចំនួន ១៦ លានករណី ​ដោយចំណាយថវិកា​អស់​ប្រមាណ ៤៦៣លានដុល្លា ឬ ២៩​ ដុល្លារ ក្នុងម្នាក់ក្នុងមួយឆ្នាំ។ នេះបើតាមរបាយការណ៍​របស់ក្រសួងកាងារ និងបណ្តុះបណ្តាលវិជ្ជាជីវៈ៕អត្តបទ៖ទូច សោភ័ណ