យោងតាមរបាយការណ៍ចុងក្រោយរបស់គណៈកម្មាធិការអចិន្ត្រៃយ៍ជាតិ ទទួលបន្ទុកគ្រប់គ្រងនិងបង្ការគ្រោះមហន្តរាយធម្មជាតិរបស់ប្រទេស បានឲ្យដឹងនៅថ្ងៃពុធនេះថា ភ្លៀងធ្លាក់ខ្លាំង ចាប់តាំងពីដើមសប្តាហ៍នេះ បានបណ្តាលឱ្យមនុស្សបីនាក់បាត់ខ្លួននៅក្នុងតំបន់ភាគកណ្តាលប្រទេសវៀតណាម។

សារព័ត៌មានវៀតណាមបានរាយការណ៍ថា មនុស្សប្រហែល ៤០ នាក់ រួមទាំងអ្នកដែលមកពីកងកម្លាំងយោធា នគរបាល និងក្រុមការពារទឹកជំនន់និងព្យុះក្នុងតំបន់ ត្រូវបានដាក់ពង្រាយចល័តដើម្បីស្វែងរកប្តីប្រព័ន្ធពីរនាក់បាត់ខ្លួន ដែលគេជឿថាត្រូវបានទឹកជំនន់ហូរនាំ នៅក្នុង ស្រុក Huong Hoa ខេត្ត Quang Tri ។ ប្តីប្រពន្ធទាំងពីនាក់ បានដើររកសត្វពពែ ប៉ុន្តែខ្សែទឹកនៅតំបន់ Nguon Rao ឡើងខ្ពស់ បានរារាំងពួកគេមិនឱ្យត្រឡប់មកផ្ទះវិញបាន។

បុរសម្នាក់ទៀតនៅស្រុក Vinh Linh បានបាត់ខ្លួននៅពេលនេសាទនៅបឹងធារាសាស្ត្រ La Nga។ ទ្រព្យសម្បត្តិផ្ទាល់ខ្លួនរបស់បុរសរូបនេះ ត្រូវបានគេរកឃើញនៅក្នុងតំបន់នោះ។

លំនៅឋានជាង ១.៣០០ខ្នង នៅខេត្ត Quang Tri និងទីក្រុង Da Nang ត្រូវបានជន់លិច។ ភ្លៀង បានបង្កឱ្យមានហានិភ័យនៃបំណាក់ដីនៅតំបន់ភ្នំ ការជន់លិចនៅតំបន់ទំនាប និងកាត់ផ្តាច់ផ្លូវជាច្រើនកន្លែង។

យោងតាមការិយាល័យស្ថិតិទូទៅបានឱ្យដឹងថា គ្រោះមហន្តរាយធម្មជាតិនៅប្រទេសវៀតណាម បានបណ្តាលឱ្យមនុស្ស ១៣៦នាក់ស្លាប់ ឬបាត់ខ្លួន និង ១៣០ នាក់ផ្សេងទៀតរងរបួសក្នុងរយៈពេល ១០ ខែដំបូងនៃឆ្នាំនេះ។