កិច្ចប្រជុំថ្នាក់តំបន់នៃរដ្ឋមន្ត្រីការពារជាតិមកពីសមាគមប្រជាជាតិអាស៊ីអាគ្នេយ៍ (អាស៊ាន) បានចាប់ផ្តើមនៅទីក្រុងហ្សាកាតា របស់ប្រទេសឥណ្ឌូណេស៊ី នៅថ្ងៃពុធ (១៥ វិច្ឆិកា) នេះ ស្របពេលមានវិបត្តិសកលជាច្រើន ហើយជម្លោះដែលកំពុងបន្តនៅក្នុងប្រទេសមីយ៉ាន់ម៉ា និងសង្គ្រាមអ៊ីស្រាអែល ជាមួយក្រុមហាម៉ាស នឹងក្លាយជាចំណុចសំខាន់ក្នុងការពិភាក្សា។

បណ្ដារដ្ឋមន្ត្រីការពារជាតិ មកពីប្លុកអាស៊ីមួយនេះ កំពុងចូលរួមកិច្ចប្រជុំរយៈពេល ២ថ្ងៃជាមួយតួអង្គសំខាន់ៗនៅឥណ្ឌូប៉ាស៊ីហ្វិក ខណៈមហាអំណាចធំៗ កំពុងបង្កើនឥទ្ធិពលក្នុងតំបន់ និងនៅពេលដែលជម្លោះកាន់តែស៊ីជម្រៅចាប់ពីសហភាពមីយ៉ាន់ម៉ា រហូតដល់មជ្ឈិមបូព៌ា ជាដើម។

នៅក្នុងសុន្ទរកថាបើក រដ្ឋមន្ត្រីការពារជាតិឥណ្ឌូណេស៊ី លោក ប្រាបូវ៉ូ សុបៀនតូ (Prabowo Subianto) បានជំរុញសមាជិកអាស៊ាន ឱ្យស្វែងរកដំណោះស្រាយយូរអង្វែងចំពោះវិបត្តិនៅក្នុងប្រទេសមីយ៉ាន់ម៉ា។ លោក Prabowo និងសមភាគីម៉ាឡេស៊ី លោក ហាជី ម៉ូហាមេដ ប៊ីនហាជី ហាសាន (Haji Mohamad Bin Haji Hasan) ក៏បានអំពាវនាវឱ្យមានបទឈប់បាញ់នៅតំបន់ហ្កាហ្សា ផងដែរ។

កិច្ចប្រជុំប្រចាំឆ្នាំនេះ ធ្វើឡើងនៅពេលដែលជម្លោះកំពុងឆាបឆេះនៅមជ្ឈិមបូព៌ា និងអ៊ុយក្រែន និងនៅពេលដែលភាពតានតឹងកំពុងកើនឡើងនៅក្នុងដែនទឹកជម្លោះនៅសមុទ្រចិនខាងត្បូង ដោយប្រទេសចិន ត្រូវបានចោទប្រកាន់ពីបទឈ្លានពានប្រឆាំងនឹងហ្វីលីពីន ដែលមានសហរដ្ឋអាមេរិកគាំទ្រ និងស្វះស្វែងពង្រឹងទំនាក់ទំនងយោធារបស់ខ្លួនជាមួយប្រទេសជប៉ុន៕