ប្រធានសភានៃប្រទេសវ៉េណេហ្ស៊ុយអេឡា បាននិយាយថា លោកនឹងមិនអញ្ជើញអ្នកសង្កេតការណ៍បោះឆ្នោតអឺរ៉ុប នៅឆ្នាំក្រោយទេ បន្ទាប់ពីសហភាពអឺរ៉ុប បានបន្តដាក់ទណ្ឌកម្មលើមន្ត្រីវ៉េណេហ្ស៊ុយអេឡាហាសិបនាក់នោះ។

លោក Jorge Rodríguez បាននិយាយថា សហភាពអឺរ៉ុប «មិនអាចមិនលម្អៀង និងត្រឹមត្រូវ» បន្ទាប់ពីខ្លួនបានបន្តដាក់ទណ្ឌកម្មលើមន្ត្រីរដ្ឋាភិបាលរាប់សិបនាក់កាលពីថ្ងៃចន្ទ រួមទាំងប្រធានស្ថាប័នបោះឆ្នោត លោកElvis Amoroso សម្រាប់រយៈពេល៦ខែទៀត។

នេះជាលើកទី២ហើយ ដែលលោក Rodríguez បដិសេធជាសាធារណៈនូវការសង្កេតពីក្រុមអឺរ៉ុប ប៉ុន្តែជាលើកទីមួយ ចាប់តាំងពីបានឈានដល់កិច្ចព្រមព្រៀងជាមួយក្រុមប្រឆាំងរបស់វ៉េណេហ្ស៊ុយអេឡា សម្រាប់ការបោះឆ្នោតដោយសេរី និងយុត្តិធម៌ ជាថ្នូរនឹងការបន្ធូរបន្ថយទណ្ឌកម្ម។ លោក Rodríguez ដែលជាសម្ព័ន្ធមិត្តជិតស្និទ្ធរបស់លោកប្រធានាធិបតី នីកូឡាស ម៉ាឌូរ៉ូ ( Nicolás Maduro) បាននិយាយថា សហភាពអឺរ៉ុប នឹងមិនត្រូវបានអញ្ជើញឲ្យត្រួតពិនិត្យការបោះឆ្នោតប្រធានាធិបតីឆ្នាំ ២០២៤ទេ ដរាបណាការដាក់ទណ្ឌកម្មរបស់ពួកគេ នៅតែមាននោះ។

លោក Rodríguez បាននិយាយថា សហភាពអឺរ៉ុប បានរំលោភលើកិច្ចព្រមព្រៀងដោយការបន្តដាក់ទណ្ឌកម្ម ទោះបីជាខ្លួនបានកាត់បន្ថយរយៈពេលពិនិត្យវិធានការពិសេសពី ១២ ខែមក ៦ ខែក៏ដោយ។ ជាផ្នែកមួយនៃកិច្ចព្រមព្រៀងដែលបានចុះហត្ថលេខាកាលពីខែតុលា វ៉េណេហ្ស៊ុយអេឡា បានយល់ព្រមអញ្ជើញអង្គការចំនួន៥ រួមទាំងសហភាពអឺរ៉ុប ឲ្យមកត្រួតពិនិត្យការបោះឆ្នោត នៅឆ្នាំក្រោយ។