ជនប៉ាឡេស្ទីន បានប្រញាប់ប្រញាល់ទៅកាន់មន្ទីរពេទ្យនៅតំបន់ភាគខាងត្បូងហ្គាហ្សា បន្ទាប់ពីការវាយប្រហារតាមច្រកអាកាសត្រូវចំអគាររស់នៅរបស់ពួកគេកាលពីថ្ងៃអង្គារ ។ អ្នករងរបួស រួមទាំងកុមារ ទទួលបានការព្យាបាលនៅមន្ទីរពេទ្យ Al Nasser ស្ថិតក្នុងទីក្រុង Khan Younis ប៉ុន្តែការព្រួយបារម្ភកើតមាននៅក្នុងចំណោមជនប៉ាឡេស្ទីនជម្លៀស ស្របពេលដែលរដូវរងាខិតជិតមកដល់ ។

លោក Ahmed Al-Mandhari គឺជាប្រធានអង្គការសុខភាពពិភពលោកប្រចាំតំបន់មេឌីទែរ៉ាណេខាងកើត បាននិយាយប្រាប់ទីភ្នាក់ងារព័ត៌មានរ៉យទ័រថា ស្ថានភាពប្រព័ន្ធថែទាំសុខភាពនៅតំបន់ហ្គាហ្សា កាន់តែអាក្រក់ទៅរាល់ពេល ខណៈដែលមន្ទីរពេទ្យ ២៥កន្លែងនៅក្នុងចំណោមមន្ទីរពេទ្យ ៣៦កន្លែង លែងផ្គត់ផ្គង់សេវាកម្ម ។

សម្រាប់ជនប៉ាឡេស្ទីនជាប់ខ្លួននៅក្នុងតំបន់ហ្គាហ្សាដែលរងការវាយប្រហាររបស់អ៊ីស្រាអែល ការចាប់ផ្តើមរដូវវស្សា បានធ្វើឲ្យពួកគេកាន់តែអស់សង្ឃឹម ពេលដែលពួកគេគ្មានផ្ទះសម្បែង ឬរស់នៅក្នុងសំពត់តង់បណ្តោះអាសន្ន ក្នុងនោះការរំពឹងដល់ទឹកជន់ នឹងបង្កឲ្យមានការព្រួយបារម្ភចំពោះការរីករាលដាលឆ្លងជំងឺ ។

អ្នកស្រី Fayeza Srourដែលជាជនប៉ាឡេស្ទីនជម្លៀសខ្លួនមួយរូបចេញពីតំបន់ភាគខាងជើងហ្គាហ្សា និយាយថា រដូវរងាគឺជាសុបិនអាក្រក់ ស្ថានភាពដែលពួកយើងប្រឈមបច្ចុប្បន្នគឺជាសុបិនអាក្រក់រួចទៅហើយ ។ កាលពីមុន ខ្ញុំធ្លាប់បន់ឲ្យរដូវរងាមកដល់ ហើយនិងបន់ឲ្យមានភ្លៀងធ្លាក់ ដើម្បីឲ្យដើមឈើចាប់ផ្តើមលូតលាស់ ទើបពួកយើងអាចប្រមូលផលបាន ។ 

អ្នកស្រីបន្តថា ប៉ុន្តែបច្ចុប្បន្នខ្ញុំបួងសួងរាល់ថ្ងៃសុំកុំឲ្យមានភ្លៀងធ្លាក់ ។ ពួកយើងរស់នៅក្នុងសំពត់តង់ គ្មានអ្វីការពារពួកយើងនោះទេ ។ ពេលដែលមានភ្លៀងធ្លាក់ ពួកយើងនឹងត្រូវលិចលង់ ។

ខណៈពេលនោះដែរ ក្រុមគ្រូពេទ្យ និងក្រុមគ្រួសារជនប៉ាឡេស្ទីនដែលជាប់ពន្ធនាគារ បានដង្ហែក្បួននៅក្នុងទីក្រុង Hebron តំបន់វ៉េសប៊ែង ដើម្បីអំពាវនាវឲ្យមានបទឈប់បាញ់នៅតំបន់ហ្គាហ្សា និងដោះលែងអ្នកទោសនៅក្នុងពន្ធនាគារអ៊ីស្រាអែល ៕